Moskvada 22-iyun kuni ikki tomonlama hamkorlik bo‘yicha hukumat rahbarlari darajasidagi O‘zbekiston—Rossiya qo‘shma komissiyasining ikkinchi yig‘ilishi bo‘lib o‘tadi. Bu haqda Rossiyaning O‘zbekistondagi elchisi Oleg Malginov ma’lum qildi, deb xabar bermoqda “Podrobno.uz”.
Uning so‘zlariga ko‘ra, O‘zbekiston—Rossiya bo‘lajak yig‘ilishiga har tomonlama tayyorgarlik ko‘rish ikki mamlakat bosh vazirlari muzokaralarining asosiy mavzularidan biri bo‘ladi.
“Bugungi kunda Rossiya va O‘zbekiston barcha yo‘nalishlarda: siyosat va iqtisodiyotdan tortib energetika, ta’lim va fangacha ikki tomonlama hamkorlikni rivojlantirmoqda. Hatto koronavirus pandemiyasi ham mamlakatlarimiz hamkorligini yuqori darajaga ko‘tarish va aloqalarni diversifikatsiya qilish yo‘lida prezidentlar ko‘zlagan yo‘lga to‘siq bo‘la olmadi.
Bunday murakkab sharoitlarda o‘zaro savdo ko‘rsatkichlarini muntazam ravishda oshirib borayotganimiz ahamiyatlidir. Xususan, o‘zaro savdo aylanmasi, O‘zbekiston statistika ma’lumotlariga ko‘ra, 2021-yilning 4 oyida o‘tgan yilning shu davriga nisbatan 8,4 foizga o‘sib, 1,8 milliard dollarni tashkil etdi”, — degan elchi.
Shuningdek, u 2021-yilda O‘zbekiston Prezidenti Shavkat Mirziyoyevning Rossiyaga davlat tashrifi doirasida rejalashtirilgan mintaqalararo hamkorlikning ikkinchi forumi ikki mamlakat o‘rtasidagi to‘g‘ridan-to‘g‘ri aloqalarga yangi turtki berishini qo‘shimcha qilgan.
Eslatib o‘tamiz, O‘zbekiston—Rossiya qo‘shma komissiyasining hukumat rahbarlari darajasidagi birinchi yig‘ilishi 2019-yil may oyida bo‘lib o‘tgandi, O‘zbekiston va Rossiya o‘rtasida hududlararo hamkorlikning birinchi forumi 2018-yilda o‘tkazilgan.
Izoh (0)