Наманган вилоятида бу йил 67750 гектар майдонда ғалла етиштирилди. Ҳар гектаридан қарийб 70 центнердан, жами 470 минг тоннадан ортиқ дон олиниши режалаштирилган. Бу ҳақда «Дарё» мухбири Азизбек Абдувалиев хабар бермоқда.
Вилоятда ҳозиргача ғалласи ўриб олинган 2300 гектардан ошиқ майдонда дуккаклилар, сабзавот, шоли, полиз ва озуқа экинлари экиш бошлаб юборилди.
Жумладан, Тўрақўрғон туманида бу йил 4880 гектар майдонда ғалла парваришланди. 1080 гектар ҳосилдан бўшаган ер аёллар ва ёшлар дафтарида турадиганлар, сувчи, пиллакор, чопиқчи, шунингдек, ишсиз фуқароларга ажратиб бериляпти. Шу тариқа туманда қарийб 10 минг кишининг бандлиги таъминланмоқда.
Туман ҳокимлиги ахборот хизматининг «Дарё»га маълум қилишича, «Қўрғонча оқ олтини» фермер хўжалигининг 6 гектар майдони ҳам шу атрофда яшайдиган аҳолига ажратилди. Улар ўша куниёқ тупроққа мош уруғини қадаб, сув тараш, ерни буғдой илдизларидан тозалашга киришиб кетди. Ерни ҳайдашдан тортиб уруғ экишгача бўлган жараёнларни фермер ўз зиммасига олди.
«Оиламда 5 кишимиз. Россияда қурилиш соҳасида ишлаб юрардим. Тўғриси, 300-400 доллар топганим билан яқинлардан узоқда бўлиш жуда оғир. Бирор иш топилса, юртимдан бир қадам ҳам йироқлашмайман, деб ният қилардим. Мана, биринчилар қатори 20 сотих ерли бўлдим. Мош экдим. Бу жойдан 400 килограммгача ҳосил олиш мумкин. Бир кило мошнинг нархи бозорда 14-15 минг сўм. Демак, икки ойда 5-6 миллион сўм даромад олишим, яна пояси билан ҳайвон боқиб, қўшимча пул топсам бўларкан», — дейди «Чусткўприк» маҳалласида яшовчи Тоиржон Усмонжонов.
Тумандаги «Шоҳсултон диёри» фермер хўжалиги томонидан 16 та, «Наманган тўқимачи» агрокластери томонидан эса 20 та эҳтиёжманд оилага рўзғорлари даромадини оширишга кўмаклашиш учун ер берилди. Улар мош, ловия, маккажўхори, ерёнғоқ экиб, хорижга экспорт ҳам қилишмоқчи.
Изоҳ (0)