Toshkent shahrining Sergeli tumani “O‘zgarish” mahallasida istiqomat qiluvchi aholi uzluksiz yoqimsiz hid kelayotganidan shikoyat qilgandi. Ekologik partiya suv tozalash inshooti va uning atrofidagi korxonalar tomonidan atrof tabiiy muhitga yetkazilayotgan zarar atroflicha o‘rganib chiqilishi hamda bunday salbiy holatlarni bartaraf etish bo‘yicha tegishli choralar ko‘rilishi lozimligini ta’kidlagandi.
Ekologiya va atrof-muhitni muhofaza qilish davlat qo‘mitasi Toshkent shahar boshqarmasi boshlig‘i o‘rinbosari Farhod Dehqonov Sergeli tumani hududida kuzatilayotgan badbo‘y hid yuzasidan 22 nafar mas’ulga ma’muriy ish qo‘zg‘atilganini ma’lum qildi.
Uning so‘zlariga ko‘ra, Sergeli tumani hududida ba’zi paytlari kuzatilayotgan badbo‘y hidni bartaraf qilish maqsadida “Toshkent shahar suv ta’minot” MChJ taqdim qilgan potensial xavfli korxonalar ro‘yxati bo‘yicha Bektemir va Salor oqova suv tozalash inshootlariga texnik suvlarni tashlovchi korxonalarda Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha biznes-ombudsman ruxsatiga asosan tekshiruvlar amalga oshirildi.
Tekshirish natijalariga ko‘ra, korxona va tashkilotlarning 22 nafar mas’uliga nisbatan Ma’muriy javobgarlik to‘g‘risidagi kodeksning tegishli moddalari bilan ma’muriy ishlar qo‘zg‘atildi. Aniqlangan kamchiliklarni bartaraf etish, korxonalarda lokal oqova tozalash tizimini ishga tushirish, ularni ta’mirlash va samarali ishlashini ta’minlash yuzasidan qisqa muddatda bajarilishi lozim bo‘lgan majburiy ko‘rsatmalar berildi.
Farhod Dehqonov, shuningdek, Bektemir tumanida joylashgan 9 ta korxona tomonidan berilgan majburiy ko‘rsatmalar o‘z vaqtida bajarilmaganligi sababli davlat ekologik ekspertizasining belgilangan muddatdan oldin amal qilishini to‘xtatish va shahar kanalizatsiya tarmog‘idan uzish maqsadida Toshkent shahar iqtisodiy sudiga da’vo arizasi kiritilganini ma’lum qilgan.
Salor oqova suv tozalash inshootiga ishlab chiqarish oqova suvlarini tashlovchi 18 ta korxonadan 11 tasida tekshirishlar amalga oshirilgan. Me’yor darajasida tozalanmagan oqova tashlayotgan korxonalar faoliyati vaqtincha to‘xtatilgan.
Eslatib o‘tamiz, Oliy Majlis Senati matbuot xizmat chiqindi suvlarni ifloslantiradigan bir qator korxonalarni tozalash inshootlarini rekonstruksiya qilish to‘g‘risida hukumat qarori loyihasi tayyorlanayotganini ma’lum qilgandi.
Izoh (0)