YHXBB: “Fuqarolar tomonidan yuborilayotgan takliflarning qariyb 80 foizi yo‘llardagi kamchiliklar haqida”

Yo‘llardagi harakat xavfsizligini ta’minlash va yo‘l-transport hodisalarining barvaqt oldini olishdagi hamda yo‘l infratuzilmasidagi muammolarni o‘rganib kelayotgan idoralararo ishchi guruh faoliyati davom etmoqda, deya xabar bemoqda YHXBB matbuot xizmati.

Ish jarayoni davomida ekspertlar “YHXBB_taklif” Telegram guruhi orqali 1000 ga yaqin fuqarodan 1847 ta, Facebook’dagi guruh orqali esa 30 nafar fuqarodan 32 ta, jami 1879 ta taklifni o‘rganib chiqmoqda.

Takliflarning 77,9 foizi yoki 1464 tasi yo‘l infratuzilmasidagi kamchiliklar va ularni bartaraf etish yuzasidan, jumladan:

• 1104 tasi yoki 58,7 foizi yo‘llarini ta’mirlash va ta’mirlanishida zamonaviy yondashuvni qo‘llash;

• 66 tasi yoki 3,5 foizi yerosti va yerusti piyodalar o‘tish joylari, ortga qayrilib olish joylarini xavfsiz tashkil etish;

• 65 tasi yoki 3,5 foizi shahar va tuman hududlarida joylashgan o‘quv muassasalari va maktablar oldida belgilangan tezlikni kamaytirish (30 tezlikka);

• 60 tasi yoki 3,2 foizi yo‘l belgilarini o‘rnatish va ayrimlarini yangilash;

• 57 tasi yoki 3,1 foizi yo‘llar sifatini yaxshilash, asfalt o‘rniga beton qoplamasi yotqizish;

• 40 tasi yoki 2,1 foizi yo‘llarda tirbandliklarning oldini olish maqsadida maxsus turargohlarni tashkil qilish va ko‘p qavatli avtomobil qo‘yish joyini qurish;

• 39 tasi yoki 2,1 foizi chorraha va yo‘llarda mavjud bo‘lgan svetoforlarni zamonaviy raqamli svetoforlarga almashtirish. Shuningdek, piyodalar uchun tugmali svetoforlar sonini oshirish;

• 33 tasi yoki 1,7 foizi fuqarolar yo‘l inshootlari, yo‘l belgilarini o‘rnatish va qayta jihozlash masalalarini YHXB tizimiga qaytarib berish hamda yuk avtomashinalarini shahar hududidan tashqariga olib chiqib, ushbu yo‘lda harakatlanishini yo‘lga qo‘yish.

• 84 tasi yoki 4,5 foizi haydovchilar tomonidan yo‘l harakati qoidasi qo‘pol ravishda buzilgan taqdirda unga belgilangan jarima miqdorini oshirib tayinlash choralarini ko‘rish;

• 52 tasi yoki 2,8 foizi piyoda yo‘laklari oldiga videokuzatuv moslamalarini o‘rnatish hamda piyodalar tomonidan huquqbuzarlik sodir etilgan vaqtda ularning aybdorlik masalalarini ko‘rib chiqish;

• 51 tasi yoki 2,7 foizi sodir etilgan qoidabuzarliklarga nisbatan nafaqat jarima qo‘llash, balki qoidabuzarliklarni ballik ravishda baholash tizimini joriy etish;

• 13 tasi yoki 0,7 foizi yo‘l harakati ishtirokchilari tomonidan sodir etilgan barcha qoidabuzarliklarga nisbatan belgilangan jarimalarni kamaytirish choralarini ko‘rish.

• 82 tasi yoki 4,3 foizi fuqaro yilning issiq faslida tonirovkalarni arzonlashtirish yoki davlatga to‘lanishi lozim bo‘lgan to‘lovni ushbu mavsumda olib tashlash;

• 63 tasi yoki 3,3 foizi haydovchilarni o‘qitish va imtihon olish jarayonida inson omilini cheklash va korrupsiyaning oldini olish, maktab davrida YHQ darsligini kiritish va bitirguniga qadar o‘qitish;

• 45 tasi yoki 2,4 foizi DYHXX xodimlarining malakasini oshirish, sohani yuqori intellektual xodimlar bilan jamlash, ularni doimiy ravishda malakasini oshirish bo‘yicha o‘qitib borish tizimini yo‘lga qo‘yish;

• 16 tasi yoki 0,9 foizi aniqlangan jarimalar o‘z vaqtida pochta orqali egalariga kelmasligi va buning oqibatida imtiyozli to‘lov amalga oshirishning imkoni bo‘lmayotganligi;

• 9 tasi yoki 0,5 foizi YHX yo‘nalishi bilan bog‘liq muammo va murojaatlar o‘z vaqtida ko‘rib chiqilmaganligi, 1102 ishonch telefoni umuman ishlamasligi va ushbu tizimni isloh qilish lozimligi.

Eslatib o‘tamiz, O‘zbekistonda yo‘l harakati sohasidagi muammolarni o‘rganish va ularni bartaraf etish bo‘yicha ishchi guruh tuzilgan edi. Guruh tomonidan yo‘llarda harakat xavfsizligini ta’minlash va yo‘l-transport hodisalarining barvaqt oldini olishning bugungi kundagi holati kompleks ravishda o‘rganilib, xorijiy tajriba va ilmiy yondashuvlarni qo‘llash asosida normativ-huquqiy va manzilli tashkiliy-amaliy choralar ishlab chiqiladi.

Alohida e’tibor yo‘l infratuzilmasi bilan bog‘liq jiddiy muammolar — yo‘llarning holati, piyodalar o‘tish joyi, yo‘l belgilari, tartibga solinmagan chorrahalar va boshqalarga qaratilib, ularni tubdan yaxshilash bo‘yicha har tomonlama choralar ko‘rilishi qayd etilgandi.