O‘zbekistondagi chorraha va yo‘llarda radar va kameralar qo‘yish joylari auksion orqali savdoga qo‘yilishi boshlandi, deya xabar bermoqda YHXBB.
Qayd etilishicha, Vazirlar Mahkamasining 2021-yil 21-apreldagi 232-sonli qarori asosida radar va kameralar o‘rnatish joylari E-auksion savdo maydonchasi orqali sotilishi belgilangandi. Ushbu qarorga asosan onlayn-auksionlar Elektron onlayn-auksionlarni tashkil etish markazi va Ichki ishlar vazirligi tomonidan tasdiqlangan reglament asosida tashkil etiladi.
Obyekt onlayn-auksionda g‘olib bo‘lgan tadbirkorga mulk huquqi asosida cheklanmagan muddatga, boshqa tadbirkorlarga o‘tkazish huquqi bilan biriktiriladi. Lotning joy dislokatsiyasi, hududdagi transport oqimi va oxirgi 2 yilda aniqlangan qoidabuzarliklar to‘g‘risidagi ma’lumotlar ochiq e’lon qilinadi.
Hozirda:
- Xorazm viloyati, Bog‘ot tumanida radar va kameralar o‘rnatish huquqi savdoga chiqarildi. Ushbu lotda 4 ta intellektual videokamera va 2 ta statsionar radar o‘rnatilishi belgilangan;
- Xorazm viloyati, Xiva shahrida radar va kameralar o‘rnatish huquqi savdoga chiqarildi. Ushbu lotda 4 ta intellektual videokamera va 1 ta statsionar radar o‘rnatilishi belgilangan;
- Namangan viloyati, Kosonsoy tumanida radar va kameralar o‘rnatish huquqi savdoga chiqarildi. Ushbu lotda 1 ta intellektual videokamera va 1 ta statsionar radar o‘rnatilishi belgilangan.
Yaqin fursatlarda boshqa hududlardan ham bu singari huquqlarning savdoga chiqarilishi ko‘zda tutilgan.
Bundan avval O‘zbekistonda tadbirkorlar tomonidan qoidabuzarliklarni aniqlash uchun kameralar o‘rnatish tartibi belgilangani, Surxondaryoda radar yo‘nalishini o‘zgartirib qo‘ygan haydovchilar 10 sutkaga qamalgani hamda O‘zbekistonda tadbirkorlarning radar o‘rnatishiga ruxsat beriladigan hududlarning auksion narxlari e’lon qilingani haqida xabar berilgandi.
