O‘zbekiston Ichki ishlar vazirligi matbuot xizmati 1-iyun kuni respublikada yo‘l harakati sohasidagi muammolarni kompleks o‘rganish va ularni bartaraf etish bo‘yicha idoralararo ishchi guruh tuzilganligini e’lon qildi.

Xabarda qayd etilishicha, respublikada transport vositalaridan foydalanish xavfsizligi qoidalarini qo‘pol ravishda buzish holatlari yuqoriligi, yo‘l infratuzilmasidagi jiddiy muammolar yo‘l-transport hodisalarini keltirib chiqarayotganligi, oqibatda ko‘plab insonlarning tan jarohat olishi, ularning bevaqt vafot etayotganligi holatlari ko‘payib bormoqda.

Guruh tarkibiga hukumat, Ichki ishlar, Transport, Moliya vazirliklari, Avtomobil yo‘llari qo‘mitasi va boshqa mutasaddi idoralar va tashkilotlarning rahbar va malakali mutaxassislari kiritilgan.

Guruh tomonidan yo‘llarda harakat xavfsizligini ta’minlash va yo‘l-transport hodisalarining barvaqt oldini olishning bugungi kundagi holati kompleks ravishda o‘rganilib, xorijiy tajriba va ilmiy yondashuvlarni qo‘llash asosida normativ-huquqiy va manzilli tashkiliy-amaliy choralar ishlab chiqiladi.

Alohida e’tibor yo‘l infratuzilmasi bilan bog‘liq jiddiy muammolar — yo‘llarning holati, piyodalar o‘tish joyi, yo‘l belgilari, tartibga solinmagan chorrahalar va boshqalarga qaratilib, ularni tubdan yaxshilash bo‘yicha har tomonlama choralar ko‘riladi.

“Yo‘l harakati xavfsizligi bo‘yicha aholini qiynayotgan muammolar o‘rganilib, ko‘riladigan kompleks chora-tadbirlar haqida jamoatchilikka axborot beriladi hamda fuqarolar tomonidan bildirilgan takliflar sinchkovlik bilan o‘rganib chiqiladi”, — deyiladi IIV xabarida.

Ommaviy axborot vositalari va jamoatchilik vakillari ishchi guruh tarkibiga kiritiladimi-yo‘qmi, unga takliflarni qanday kiritish mumkinligi haqida ma’lumot berilmagan.

Ma’lumot uchun, O‘zbekistonda 1 hafta (24-may 31-may) davomida sodir bo‘lgan YTHlarda 20 ga yaqin kishi vafot etdi.

Jumladan:

  • Surxondaryoning Sho‘rchi tumanida, taxminan, soat 02:15 da “KamAZ” va Damas ishtirokidagi YTH oqibatida Damas haydovchisi va uning yonida bo‘lgan yo‘lovchi halok bo‘lgan, shuningdek, Damas’ning ikki yo‘lovchisi (jumladan, 2-sinfda o‘qiydigan qiz) tan jarohati olib, reanimatsiyaga yotqizilgan;
  • Toshkentdagi Bunyodkor shohko‘chasining Chilonzor tumanidan o‘tgan qismida, taxminan, soat 04:45 da Spark haydab ketayotgan 36 yoshli F.Yu. boshqaruvni yo‘qotib, qarama-qarshi yo‘nalishni ajratib turuvchi to‘siqqa borib urilgan va shifokorlarning urinishlariga qaramay, kasalxonada vafot etgan;
  • Toshkent viloyatining Angren shahrida, taxminan, soat 09:00 da dastlab Nexia-3 avtomobili yo‘lni ajratib turuvchi beton to‘siqqa urilgan, shundan so‘ng shu yo‘nalishda orqadan harakatlanib kelayotgan mashinalar sekinlashgan vaqtda me’yoridan ko‘p yuk ortilgan MAN yuk mashinasi tormozi ishlamay qolib, uchta Lacetti, Nexia-2 va Cobalt bilan to‘qnashgan (Lacetti’lardan biri yonib ketgan), hodisa oqibatida yetti kishi halok bo‘lgan, 14 kishi tan jarohati olib, kasalxonaga yotqizilgan;
  • Xorazmning Yangiariq tumanida, taxminan, soat 17:30 da 39 yoshli haydovchi qoidaga xilof ravishda o‘ng tomondan quvib o‘tishga urinish vaqtida yo‘l chetidagi olti nafar 11-sinf bitiruvchisini urib yuborib, ariqqa ag‘darilgan. Hodisa oqibatida uch nafar o‘quvchi hodisa joyida, bir nafari kasalxonada vafot etgan, yana ikki o‘quvchi og‘ir ahvolda shifoxonada yotibdi;
  • Namanganning Pop tumanida, taxminan, soat 18:00 da haydovchi J.J. Nexia avtomobilida harakatlanayotib, boshqaruvni yo‘qotgan va beton to‘siqqa urilib, pastlikka tushib ketgan. Oqibatda haydovchi hamda ikki yo‘lovchi — 20 yoshli A.R. va 35 yoshli A.Q. tan jarohatlari olib, tuman shifoxonasiga murojaat qilgan, yana bir yo‘lovchi Ya.B. esa tan jarohatlari sababli vafot etgan.
  • Toshkent halqa yo‘li va Bunyodkor shohko‘chalari kesishmasidagi aylanma ko‘prik ustida avtobuslardan biri piyodalar o‘tish yo‘lagidan o‘tayotgan fuqarolarga yo‘l berib to‘xtagan paytda, uning ortidan kelayotgan boshqa bir Isuzu haydovchisi o‘z vaqtida tormozlanishni amalga oshira olmay, uning ortiga kelib urilgan. Oqibatda piyodalardan biri og‘ir ahvolda shifoxonga yuborilgan. Biroq jabrlanuvchi shifoxonaga yetib borishi bilan vafot etgan.
  • Samarqand viloyatining Paxtachi tumanida 31-may kuni soat 12:21 larda Samarqand—Buxoro—Turkmanboshi avtomobil yo‘lining 124-kilometrida R.A. boshqaruvidagi Nexia rusumli avtomashina piyodalar o‘tish yo‘lakchasidan o‘tayotgan piyodalarga yo‘l berish uchun to‘xtagan. Shu yo‘nalish bo‘ylab orqa tomonidan oraliq masofani saqlamasdan kelayotgan Isuzu yuk mashinasi Nexia’ga kelib urilgan. Yengil mashina ichida bo‘lgan yo‘lovchi ko‘rsatilgan muolajalarga qaramay tibbiyot bo‘limida vafot etgan.

Bundan tashqari, Farg‘onada bir haftada (10—17-may) YTHlar oqibatida 20 kishi halok bo‘lgani hamda O‘zbekistonda o‘tgan to‘rt oy ichida sodir bo‘lgan YTHlar oqibatida 557 kishi halok bo‘lgani haqida xabar berilgandi.