AQSh prezidenti Jo Bayden hamda Ukraina prezidenti Vladimir Zelenskiy 7-iyun kuni telefon orqali suhbatlashdi. Suhbat davomida Bayden Zelenskiyni ushbu yozda Vashingtonga taklif qildi, deb yozadi “RBK” Oq uy vakiliga tayanib.
Xabarga ko‘ra, suhbatda AQSh prezidenti, shuningdek, Jenevada Vladimir Putin bilan uchrashuvi chog‘ida Ukraina suverenitetini himoya qilish niyati borligini ma’lum qilgan.
Baydenning taklifiga javoban Zelenskiy uchrashuv iyul oyida bo‘lib o‘tishini aytib, Ukraina va AQSh o‘rtasidagi hamkorlikni kengaytirish masalasini muhokama qilishni orziqib kutayotganini ta’kidlagan.
Kiyev Zelenskiyning Bayden bilan muzokaralarini AQSh prezidenti Vladimir Putin bilan 16-iyun kuni bo‘lib o‘tadigan Jenevadagi sammitga borishidan oldin tashkil etishni rejalashtirgan edi. May oyi oxirida Ukraina tashqi ishlar vazirining o‘rinbosari Yevgeniy Yenin ushbu rejalar haqida e’lon qildi, “Zerkala Nedeli” nashri esa suhbat telefon orqali bo‘lishi mumkinligini xabar qilgan.
Ammo keyinchalik telefon orqali emas, balki yuzma-yuz uchrashuv tashkil qilish bo‘yicha takliflar yangray boshladi. Xususan, Ukrainaning sobiq prezidenti, Zelenskiyning siyosiy raqibi Pyotr Poroshenko Amerika kongressmenlariga murojaat qilib, shu shakldagi uchrashuvni tashkil qilishda yordam so‘ragan.
7-iyun kuni Zelenskiyning o‘zi Axios’ga bergan intervyusida Bayden bilan Jenevadagi sammitdan oldin gaplashish niyatidaligini aytgan. Ukraina prezidenti Baydenning bandligini hisobga olgan holda bunday muzokaralar har qanday shaklda o‘tkazilishi mumkinligini ta’kidlagan, ammo uning shaxsiy fikriga ko‘ra, “bu kabi maslahatlashuvlar yuzma-yuz bo‘lib o‘tishi kerak, chunki ko‘p narsalarni telefon orqali muhokama qilib bo‘lmaydi”.
Intervyuda Zelenskiy Bayden bilan “dunyoning istalgan joyida va istalgan vaqtda” uchrashishga tayyorligini aytgan. AQSh prezidenti ma’muriyatidagi manbaning ta’kidlashicha, Oq uy Vladimir Zelenskiyni sammit oldidan Vashingtonga taklif qilish imkoniyatini ko‘rib chiqqan, ammo bunday qilmaslik to‘g‘risida qaror qabul qilingan. Sammit oldidan uchrashuv o‘tkazilmasligi to‘g‘risida qaror Ukraina hukumatining “Naftogaz” energetika kompaniyasi rahbariyatini almashtirish to‘g‘risidagi qaroridan so‘ng qabul qilingan, deb xabar beradi Axios. Nashrning ta’kidlashicha, AQSh Ukraina prezidenti korrupsiyaga qarshi kurashish harakatlaridan shu tarzda chekinayotganidan xavotirda.
Izoh (0)