АҚШ президенти Жо Байден ҳамда Украина президенти Владимир Зеленский 7 июнь куни телефон орқали суҳбатлашди. Суҳбат давомида Байден Зеленскийни ушбу ёзда Вашингтонга таклиф қилди, деб ёзади «РБК» Оқ уй вакилига таяниб.
Хабарга кўра, суҳбатда АҚШ президенти, шунингдек, Женевада Владимир Путин билан учрашуви чоғида Украина суверенитетини ҳимоя қилиш нияти борлигини маълум қилган.
Байденнинг таклифига жавобан Зеленский учрашув июль ойида бўлиб ўтишини айтиб, Украина ва АҚШ ўртасидаги ҳамкорликни кенгайтириш масаласини муҳокама қилишни орзиқиб кутаётганини таъкидлаган.
Киев Зеленскийнинг Байден билан музокараларини АҚШ президенти Владимир Путин билан 16 июнь куни бўлиб ўтадиган Женевадаги саммитга боришидан олдин ташкил этишни режалаштирган эди. Май ойи охирида Украина ташқи ишлар вазирининг ўринбосари Евгений Енин ушбу режалар ҳақида эълон қилди, «Зеркала Недели» нашри эса суҳбат телефон орқали бўлиши мумкинлигини хабар қилган.
Аммо кейинчалик телефон орқали эмас, балки юзма-юз учрашув ташкил қилиш бўйича таклифлар янграй бошлади. Хусусан, Украинанинг собиқ президенти, Зеленскийнинг сиёсий рақиби Пётр Порошенко Америка конгрессменларига мурожаат қилиб, шу шаклдаги учрашувни ташкил қилишда ёрдам сўраган.
7 июнь куни Зеленскийнинг ўзи Axios’га берган интервьюсида Байден билан Женевадаги саммитдан олдин гаплашиш ниятидалигини айтган. Украина президенти Байденнинг бандлигини ҳисобга олган ҳолда бундай музокаралар ҳар қандай шаклда ўтказилиши мумкинлигини таъкидлаган, аммо унинг шахсий фикрига кўра, «бу каби маслаҳатлашувлар юзма-юз бўлиб ўтиши керак, чунки кўп нарсаларни телефон орқали муҳокама қилиб бўлмайди».
Интервьюда Зеленский Байден билан «дунёнинг исталган жойида ва исталган вақтда» учрашишга тайёрлигини айтган. АҚШ президенти маъмуриятидаги манбанинг таъкидлашича, Оқ уй Владимир Зеленскийни саммит олдидан Вашингтонга таклиф қилиш имкониятини кўриб чиққан, аммо бундай қилмаслик тўғрисида қарор қабул қилинган. Саммит олдидан учрашув ўтказилмаслиги тўғрисида қарор Украина ҳукуматининг «Нафтогаз» энергетика компанияси раҳбариятини алмаштириш тўғрисидаги қароридан сўнг қабул қилинган, деб хабар беради Axios. Нашрнинг таъкидлашича, АҚШ Украина президенти коррупцияга қарши курашиш ҳаракатларидан шу тарзда чекинаётганидан хавотирда.
Изоҳ (0)