Rossiya prezidenti Vladimir Putin va AQSh prezidenti Jo Baydenning uchrashuvi 16-iyun kuni Shveysariyaning Jeneva shahrida bo‘lib o‘tadi. Bu haqda Kreml veb-saytiga tayanib, “RBK” xabar berdi.

Foto: “TASS”

Kreml qayd etishicha, tomonlar o‘zaro munosabatlarning holati va istiqbollari, strategik barqarorlik va xalqaro kun tartibidagi dolzarb masalalarni, shu jumladan, “koronavirus pandemiyasiga qarshi kurash va mintaqaviy mojarolarni hal qilishda o‘zaro aloqalarni” muhokama qiladi.

AP xabariga ko‘ra, Vashington ham uchrashuv 16-iyun kuni bo‘lib o‘tishini tasdiqladi. Oq uy matbuot kotibi Jen Psakining aytishicha, Putin va Bayden “barcha dolzarb masalalarni muhokama qiladi”.

Psaki AQSh Rossiya bilan munosabatlarda “oldindan ko‘ra bilish va barqarorlikni” tiklashga intilayotganini qo‘shimcha qildi.

13-aprel kuni AQSh prezidenti Jo Bayden rossiyalik hamkasbi bilan uchinchi davlat hududida uchrashish istagi borligini aytgan edi. Kreml sammitning Yevroittifoq davlatlaridan birida bo‘lib o‘tishi mumkinligini ma’lum qildi. 4-may kuni Bayden uchrashuvning iyun oyida bo‘lib o‘tishini “umid bilan kutayotgani”ni aytdi. Rossiya prezidentining yordamchisi Yuriy Ushakov Putin va Baydenning uchrashuvi iyun oyida bo‘lib o‘tishi mumkinligini, lekin aniq sanalar hali belgilanmaganini ma’lum qildi.

Bu AQSh Prezidenti etib saylanganidan beri Baydenning Putin bilan birinchi uchrashuvi bo‘ladi. Oxirgi marta siyosatchilar 2011-yilda Moskvada uchrashgan: o‘shanda Putin bosh vazir, Bayden vitse-prezident edi.

Putinning AQSh sobiq prezidenti Donald Tramp bilan ikki tomonlama uchrashuvi bir marta — 2018-yilda Finlandiya poytaxti Xelsinkida bo‘lib o‘tgan.