Sudanda arab mamlakatlarida yangi teraktlar uyushtirishga tayyorlanayotgan “Al-Qoida”ning to‘qqiz a’zosi hibsga olindi. Bu haqda mamlakat Bosh prokuraturasi Terrorizmga qarshi kurash departamenti vakili Ahmed Sulaymon al-Avad ma’lum qildi, deb yozmoqda Al-Sudani nashri.
Ta’kidlanishicha, jangarilar mamlakat poytaxti Xartumda hibsga olingan. “Ular orasida Suriya pasportiga ega shaxslar, shuningdek, Chad va Tunisdan kelgan muhojirlar bor”, — dedi al-Avad.
Uning qayd etishicha, hibsga olinganlarning bir qismi BMT Xavfsizlik Kengashi tomonidan qidiruvga berilgan, ulardan biri Tunisda chet ellik sayyohlarga hujum uyushtirishda ayblanmoqda.
Prokuratura vakili Sudanga noqonuniy ravishda kirib kelganini bildirdi, guruh a’zolarining ayrimlari mazkur axborotni tasdiqlagan. Huquq-tartibot idoralari xodimlarining so‘zlariga ko‘ra, qo‘lga olinganlarning aksar qismi Fors ko‘rfazi mamlakatlarida terrorchilik operatsiyalarni tayyorlash bilan shug‘ullangan.
Xabarlarga ko‘ra, BAA Sudan hukumatiga jinoyatchilarni ekstraditsiya qilish to‘g‘risida so‘rov yuborgan.
Ma’lum bo‘lishicha, 5-iyun kuni jangarilar G‘arbiy Afrikaning Burkina-Faso davlati shimolida qurolli hujum uyushtirgan. Unda yuzdan ortiq odam halok bo‘lgan. Mamlakat hukumati bu so‘nggi besh yil ichidagi eng yirik terakt ekanini ta’kidlagan. Yaga provinsiyasidagi qishloq aholisi jangarilarning qurboniga aylangan.
Avvalroq “Al-Qoida” AQShga qarshi “har tomondan hujum qilish” bilan keng ko‘lamli urush boshlashni va’da qilgandi. Terrorchilik tashkiloti vakillari ushbu urushning “AQSh butun islom dunyosidan chiqarib yuborilgunga qadar” davom etishini qayd etgan.
Izoh (0)