Koronavirus infeksiyasi Giyen-Barre sindromining rivojlanishiga olib kelishi mumkin. Ushbu sindromda inson immuniteti o‘zining periferik asablariga hujum qiladi. Bu haqda Birmingem universiteti olimlarining ishlariga asoslanib EurekAlert! xabar berdi.
Giyen-Barre sindromi mushaklarning harakatini boshqaruvchi yoki og‘riqni, haroratni va teginish hissiyotlarini uzatuvchi asablarga ta’sir qilishi mumkin. Bu mushaklarning zaiflashishiga va oyoq-qo‘llarning uvushib qolishiga olib kelishi mumkin.
Tadqiqot mualliflaridan biri Aleks Rixtnerning ta’kidlashicha, koronavirusdan tuzalish mobaynida organizm tomonidan ishlab chiqariladigan antitanalar yurak, mushaklar va terining autoimmun kasalliklarini keltirib chiqaradigan antitanalarga o‘xshash.
“Ushbu autoantitanalar haqiqatan ham bemorlarda simptomlarni keltirib chiqaradimi yoki bu ko‘plab infeksiyalarning odatiy natijasimi yoki bo‘lmasa, faqat koronavirusdan keyin xarakterli bo‘ladimi, buni hali bilmaymiz”, — dedi olim.
Jahon sog‘liqni saqlash tashkiloti (JSST) veb-saytidagi ma’lumotlarga ko‘ra, Giyen-Barre sindromi ko‘pincha bakterial yoki virusli infeksiyadan keyin yuzaga keladi; emlash yoki jarrohlik uning rivojlanishiga turtki bo‘lib xizmat qilishi mumkin. Sindromlar odatda bir necha hafta davom etadi va bemorlarning aksariyati uncha uzoq bo‘lmagan muddatda og‘ir nevrologik asoratlarsiz tuzaladi.
Og‘ir holatlarda Giyen-Barre sindromi nutq va yutinish qobiliyatini susaytirishi mumkin. Sindrom har qanday yoshdagi odamlarga ta’sir qilishi mumkin, ammo u ko‘pincha kattalar va erkaklarda uchraydi.
Izoh (0)