“Turkmaniston temir yo‘llari” agentligi 1-iyundan boshlab hududlararo temiryo‘l aloqasini to‘liq tikladi, deb yozadi “Xronika Turkmenistana”.
Xabarga ko‘ra, poyezdlar sanitariya-gigiyena talablariga to‘la mos ravishda harakatlanadi. Harakatlar jadvali agentlik saytiga joylashtirilgan.
Ichki temiryo‘l harakati 2020-yilning iyul oyida JSST delegatsiyasining Ashxabodga tashrifidan so‘ng to‘xtatilgan edi. Cheklovlar 2021-yilning mart oyida yumshatila boshlandi.
Havo qatnoviga kelsak, hozirga qadar Turkmaniston aviakompaniyasining veb-saytida parvozlarni to‘xtatib turish yoki ularni qayta tiklash muddati uzaytirilgani to‘g‘risida xabar yo‘q.
Avvalroq Turkmanistonda oziq-ovqat do‘konlarida navbatga turish taqiqlangani, chunki bu prezidentning “imijiga salbiy ta’sir qilishi” haqida xabar berilgandi. Turkmaniston savdo ishlari bo‘yicha bosh vaziri o‘rinbosari Chori Gilijov 30-aprel kuni bo‘lib o‘tgan Vazirlar mahkamasi majlisida prezident Gurbanguli Berdimuhamedovga ichki bozor mahalliy mahsulotlar bilan to‘liq ta’minlangani to‘g‘risida hisobot bergan.
24-may kuni esa Berdimuhamedov Turkmaniston poytaxtining 140 yilligi munosabati bilan Ashxobodning faxriy fuqarosi unvoniga sazovor bo‘ldi.
Izoh (0)