«Туркманистон темир йўллари» агентлиги 1 июндан бошлаб ҳудудлараро темир йўл алоқасини тўлиқ тиклади, деб ёзади «Хроника Туркменистана».
Хабарга кўра, поездлар санитария-гигиена талабларига тўла мос равишда ҳаракатланади. Ҳаракатлар жадвали агентлик сайтига жойлаштирилган.
Ички темир йўл ҳаракати 2020 йилнинг июль ойида ЖССТ делегациясининг Ашхабодга ташрифидан сўнг тўхтатилган эди. Чекловлар 2021 йилнинг март ойида юмшатила бошланди.
Ҳаво қатновига келсак, ҳозирга қадар Туркманистон авиакомпаниясининг веб-сайтида парвозларни тўхтатиб туриш ёки уларни қайта тиклаш муддати узайтирилгани тўғрисида хабар йўқ.
Аввалроқ Туркманистонда озиқ-овқат дўконларида навбатга туриш тақиқлангани, чунки бу президентнинг «имижига салбий таъсир қилиши» ҳақида хабар берилганди. Туркманистон савдо ишлари бўйича бош вазири ўринбосари Чори Гилижов 30 апрель куни бўлиб ўтган Вазирлар маҳкамаси мажлисида президент Гурбангули Бердимуҳамедовга ички бозор маҳаллий маҳсулотлар билан тўлиқ таъминлангани тўғрисида ҳисобот берган.
24 май куни эса Бердимуҳамедов Туркманистон пойтахтининг 140 йиллиги муносабати билан Ашхободнинг фахрий фуқароси унвонига сазовор бўлди.
Изоҳ (0)