Jons Hopkins universiteti ma’lumotlariga ko‘ra, dunyoda COVID-19’ni yuqtirib olganlar soni 170 587 623 kishiga tenglashdi, global o‘limlar soni esa 3 547 061 kishini tashkil qilmoqda. Kasallanganlar soni bo‘yicha doimgidek AQSh (33,2 million), Hindiston (28 million), Braziliya (16,5 million), Fransiya (5,7 million) va Turkiya (5,2 million) yetakchilik qilmoqda.
Fransiya prezidenti koronavirusga qarshi emlandi
Fransiya prezidenti Emmanuel Makron COVID-19’ga qarshi vaksinatsiyadan o‘tganini ma’lum qildi.“Biz Brijit (Emmanuel Makronning rafiqasi) bilan emlandik, xuddi 25 million fransuzlar kabi, kelinglar, emlanaylik! O‘zimizni, yaqinlarimizni himoya qilish uchun”, — deb yozdi Fransiya prezidenti Twitter’da.
Makron aynan qanday vaksina olganiga aniqlik kiritilmagan.
Koronavirus shtammlari grek alifbosi harflari bilan belgilanadi
Jahon sog‘liqni saqlash tashkiloti (JSST) ma’lum qilishicha, koronavirus variantlari endi grek alifbosi harflari bilan belgilanadi, bundan maqsad — ushbu shtammlar birinchi marta aniqlangan mamlakatlarni diskriminatsiya qilmaslik.Ta’kidlanishicha, COVID-19 variantlarini ular topilgan joylar bilan atash “kamsituvchi va obro‘ to‘kuvchi xususiyatga ega bo‘lishi mumkin”, shu sababli nomlarning yangi tizimi yaratilgan.
Buning uchun tashkilot olimlar guruhini to‘plab, keng ko‘lamli maslahatlashuvlar o‘tkazgan. Mutaxassislar grek alifbosi harflaridan foydalangan holda nomlashni taklif qilgan.
Mavzuga doir: Hindiston ijtimoiy tarmoqlardan koronavirusning “hindcha” shtammi haqidagi postlarni o‘chirib tashlashni so‘radi
Falastinda Rossiyaning “Sputnik Layt” vaksinasi ro‘yxatdan o‘tkazildi
Falastin Sog‘liqni saqlash vazirligi Rossiyaning COVID-19’ga qarshi bir komponentli “Sputnik Layt” vaksinasini ro‘yxatdan o‘tkazdi.Ta’kidlanishicha, “Sputnik Layt”dan foydalanish orqali kasallikning og‘ir holatlari ehtimoli sezilarli darajada pasayib, kasalxonaga yotqizish holatlarining oldi olinadi.
Ikki komponentli “Sputnik V” vaksinasi esa Falastinda yanvarda ro‘yxatdan o‘tkazilgan edi.
Isroil barcha karantin cheklovlarini bekor qildi
Isroilda koronavirus bilan kasallanish darajasining barqaror past bo‘lib turishi tufayli barcha karantin cheklovlari bekor qilindi. 31-maygacha amal qilib kelgan cheklovlar uzaytirilmadi, kuchda qolgan yagona talab — bino ichida niqob taqish.Ommaviy va ko‘ngilochar muassasalar faoliyatiga qo‘yilgan cheklovlar bekor qilindi, endi do‘konlar va restoranlarda COVID-19’ga qarshi emlanganlik to‘g‘risidagi hujjat talab qilinmaydi.
“Olti oydan kamroq vaqt avval biz vaksinatsiya kampaniyasini boshladik. Sog‘liqni saqlash tizimi xodimlarining a’lo darajadagi ishlari tufayli biz dunyodagi eng yaxshi vaksinatsiya kampaniyasini o‘tkazdik. Biz anchadan buyon o‘z mehnatimizning kasallanish darajasining pastligi ko‘rinishidagi rohatidan bahramand bo‘lyapmiz”, — dedi sog‘liqni saqlash vaziri Yuliy Edelshteyn.
Izoh (0)