Литва ҳукумати мамлакат ҳудудида жойлашган аэропортларга йўналиши Беларусь ҳаво ҳудудидан ўтувчи рейсларни қабул қилишни ва юборишни тақиқлади. Бу ҳақда ҳукумат мажлиси якунлари бўйича коммуникация ва транспорт вазири Марюс Скуодис маълум қилди, деб ёзади Meduza. Тақиқ 25 май куни кучга киради.
Литва ҳукумати аниқлик киритишича, бундай қарор 23 май куни бортда портловчи қурилма борлиги ҳақидаги хабарлар туфайли Минск аэропортига мажбуран қўнган Ryanair самолёти билан боғлиқ ҳодисадан кейин хавфсизлик нуқтаи назаридан қабул қилинган. Афинадан Вильнюсга учаётган ушбу самолётда мухолифатчи Nexta Telegram канали собиқ бош муҳаррири Роман Протасевич бўлган ва йўловчилар Вильнюсга парвоз давом эттирилгунига қадар Минск аэропортида қарийб етти соат вақт ўтказган.
Шунингдек, Литва фуқароларига Беларусга уюштириладиган ҳар қандай сафарлардан воз кечиш, ҳозир ўша ерда бўлганларга эса мамлакатни тарк этиш қатъий тавсия этилади. Бу ҳақда мамлакат Ташқи ишлар вазирлиги маълум қилди. Вазирликнинг тавсиялари ҳам Ryanair самолёти билан юз берган ҳодисага бориб тақалади. Литвалик дипломатлар фикрича, бу вазият «фуқаролар хавфсизлиги ва ҳаёти учун таҳдид яратган».
Ryanair рейсининг қўндирилиши ҳолати бўйича Литва ҳукумати жиноят кодексининг самолётнинг қўлга олиниши ва одамларни ноқонуний ушлаб туриш моддалари бўйича расмий суриштирув бошлади.
Аввалроқ Латвиянинг airBaltic ва Венгриянинг Wizz Air авиакомпаниялари ўз самолётлари Беларусь ҳаво ҳудудини айланиб ўтаётганини маълум қилганди. Баъзи бошқа авиакомпаниялар, масалан, КLМ ҳам шундай йўл тутди. Россия авиаташувчилари эса ҳамон Беларусь ҳаво ҳудуди орқали учмоқда.
Латвия ташқи ишлар вазири Эдгар Ринкевич Евроиттифоқ Ryanair самолёти билан боғлиқ воқеага жавобан қабул қилиши мумкин бўлган чоралардан бири — Беларусь авиакомпаниялари, биринчи навбатда, Belavia’нинг Европага парвозларини тақиқлаш бўлиши мумкинлигини айтди. Financial Times маълумотларига кўра, бу тақиқ Евроиттифоқнинг 24 майдаги саммитида кўриб чиқилиши мумкин.
Мавзуга доир:
- Минскда Nexta мухолифатчи Telegram-канали собиқ муҳаррири Роман Протасевич қўлга олинди. У учаётган самолёт бомба ҳақидаги хабар туфайли Беларусга фавқулодда қўндирилди. Қўниш ҳақидаги қарорни Лукашенконинг шахсан ўзи «Европани ҳимоя қилиш» учун қабул қилган
- Саккизта мамлакат Беларусь осмонидан учиб ўтишни тақиқлашни талаб қилди
- АҚШ давлат котиби Беларусдан Нехта портали собиқ раҳбарини озодликка чиқаришни талаб қилди
- Ryanair рейсининг Минскка мажбурий қўндирилиши Евроиттифоқ саммитида муҳокама қилинади. Авиакомпаниялар Беларусь устидан учишдан бош тортмоқда. Асосий маълумотлар
Изоҳ (0)