Iroq prezidenti: “Mamlakat 2003-yildan buyon korrupsiya tufayli trillion dollar yo‘qotdi”

Iroq 2003-yildan buyon milliy iqtisodiyotning turli sohalarida amalga oshirilgan korrupsiyaviy bitimlari tufayli taxminan bir trillion dollar yo‘qotdi. Bu haqda mamlakat prezidenti Barham Solihning ma’lumotlariga tayanib, “TASS” xabar berdi.

“2003-yildan to bugunga qadar korrupsiya sababli Iroq bir trillion dollar zarar ko‘rdi”, — deb ta’kidladi Solih, uning so‘zlarini Alsumaria TV telekanali iqtibos qilib keltirdi.

Prezident bergan ma’lumotlarga ko‘ra, 20 yildan kamroq vaqt ichida mamlakat tashqarisidagi korrupsiyaviy operatsiyalar natijasida 150 milliard dollar, shuningdek, neft sohasida erishilgan g‘ayriqonuniy kelishuvlar tufayli yana millionlab dollarlar mamlakatdan olib ketilgan.

Korrupsiya va terrorizm bir-biriga bog‘liq va bir xil maqsadga ega, deb hisoblaydi Solih. Shu munosabat bilan Iroq prezidenti mamlakat parlamentiga korrupsiya orqali daromad topish to‘g‘risidagi qonun loyihasini taqdim etdi. Ushbu qonun ogohlantiruvchi choralar ko‘rish, noqonuniy yo‘l bilan olingan mablag‘larni qaytarish, korrupsiyada gumonlanuvchilarni sud hukmiga topshirish kabilarni o‘z ichiga oladi.

Iroq prezidenti IShID terroristik guruhiga qarshi kurashish uchun xalqaro ittifoq namunasida korrupsiyaga qarshi kurashish uchun ham xalqaro koalitsiya tuzishga chaqirdi. Solihning so‘zlariga ko‘ra, bu taklif “boshqa davlatlar va xalqaro agentliklar bilan kelishuvlar va hamkorliklar, shuningdek, korrupsiyani jilovlashda jahon tajribasidan foydalanish orqali mablag‘larni qaytarishga qaratilgan”.