Qirg‘izistonda korrupsiya mojarosi fonida Oliy sud raisi lavozimidan ozod qilindi

Qirg‘iziston parlamenti mamlakat Oliy sudi raisi Gulbar Kaliyevani muddatidan oldin ishdan bo‘shatish to‘g‘risida qaror qabul qildi. Bu haqda mamlakat qonun chiqaruvchi organi matbuot xizmatiga tayanib “TASS” xabar berdi.

“Bugun o‘tkazilgan yig‘ilishda deputatlar Oliy sud raisining vakolatlarini to‘xtatib turish to‘g‘risida qaror qabul qildi”, — dedi matbuot xizmati vakili 31-mart kuni. Uning so‘zlariga ko‘ra, ushbu taklif parlamentga mamlakat prezidenti Sadir Japarov tomonidan kiritilgan.

2020-yil oxirida Qirg‘iziston Milliy xavfsizlik davlat qo‘mitasi Oliy sudning bir qator mansabdor shaxslariga, shu jumladan, departamentda “Mahalliy sud” axborot tizimini tatbiq etishdagi korrupsiya belgilari asosida Kalievaga qarshi sudoldi tergovlarini boshlagan edi.

Qirg‘iziston qonunlariga ko‘ra, Oliy sud raisi parlament tomonidan uch yilga saylanadi va rasmiy vazifalarini bajarish paytida javobgarlikka tortilishi mumkin emas. Kaliyeva 2018-yil 22-sentabrda Oliy sudning bosh sudyasi bo‘lib ish boshlagan edi.

Avvalroq Bishkekning sobiq meri Albek Ibraimovga qarshi korrupsiyaga bog‘liq bo‘lgan holatlar bo‘yicha yana bir jinoiy ish qo‘zg‘atilgan edi. Nazorat qiluvchi organning so‘zlariga ko‘ra, Ibraimov Bishkek meri va Manas xalqaro aeroporti direktorlar kengashi raisi bo‘lganida Turkiyaning “Gata havo yo‘llari va transport” kompaniyasi va xalqaro aeroportning ba’zi rasmiylariga noqonuniy imtiyozlar berish orqali foyda olishni ko‘zlagan.