Shimoliy Koreya hukumati fuqarolarni chet eldan esgan shamol koronavirus infeksiyasining keng tarqalishiga sababchi bo‘lishi mumkinligi haqida ogohlantirdi. Bu haqda hukumatning “Nodon sinmun” gazetasida xabar berildi, deb yozmoqda “RBK”.
“Hattoki yomg‘ir yog‘ishi ham, qushlarning uchishi ham, shamolning g‘alati narsalarni uchirib olib kelishi, bular shunchaki tabiat hodisasi emas. Bu orqali xavfli virus tarqalishi mumkin”, — deyiladi xabarda. Hukumat fuqarolarni bunday vaziyatlarda e’tiborli bo‘lishga chaqirdi.
Materialda qaysi mamlakatlardan uchib kelayotgan “g‘alati narsalar” haqida gap ketayotgani haqida aniq aytilmagan. Lekin Janubiy Koreya faollari targ‘ibot materiallaridan iborat havo sharlarini Shimoliy Koreya hududiga muntazam ravishda uchirib turadi. Oxirgi marta bunday vaziyat aprel oyining oxirida ro‘y bergan edi.
Shuningdek, “Nodon sinmun” gazetasining materialida fuqarolar mamlakat rahbari Kim Chen In tomonidan ilgari surilgan karantin choralariga rioya qilishga da’vat etiladi. “Biz bu kurashda yengib chiqamiz, mamlakatimiz farovonligini himoya qilamiz”, — deyiladi maqolada.
Gazetaning yozishicha, aynan qat’iy karantin sog‘liqni saqlash sohasidagi inqirozni bartaraf etadi. Maqola mualliflari koronavirus muammosini qisqa vaqt ichida hal qilib bo‘lmasligini, yaratilayotgan vaksinalar “virusning doimiy mutatsiyalari sababli samarasiz” ekanini ta’kidladi.
“Nodon sinmun” gazetasi mamlakatda koronavirus bilan kasallanganlar bor-yo‘qligiga aniqlik kiritmagan. Shu bilan birga, gazeta dunyoning boshqa mamlakatlarida COVID-19 bilan kasallanish holatlari, shuningdek, hukumatlar tomonidan ko‘rilgan qat’iy choralar haqida batafsil ma’lumot bergan.
Fevral—mart oylarida chet ellik diplomatlar va ularning oila a’zolari Shimoliy Koreyani tark eta boshladi. Bir qator elchixonalar yopildi. Rossiya elchixonasi xodimlari uyga motorsiz temiryo‘l vagonlari bilan qaytishga majbur bo‘ldi.
KXDR yetakchisi Kim Chen In mamlakatda keng miqyosda ocharchilik bo‘lishi mumkinligini tan oldi. KXDRda vaziyatning yomonlashuvidagi muhim omillardan biri bu chegaralar yopilishi sababli Xitoy bilan savdo hajmining keskin pasayishi edi.
Izoh (0)