Шимолий Корея «ғалати нарсалар»дан коронавирус юқиш хавфи ҳақида огоҳлантирди

Шимолий Корея ҳукумати фуқароларни чет элдан эсган шамол коронавирус инфекциясининг кенг тарқалишига сабабчи бўлиши мумкинлиги ҳақида огоҳлантирди. Бу ҳақда ҳукуматнинг «Нодон синмун» газетасида хабар берилди, деб ёзмоқда «РБК».

«Ҳаттоки ёмғир ёғиши ҳам, қушларнинг учиши ҳам, шамолнинг ғалати нарсаларни учириб олиб келиши, булар шунчаки табиат ҳодисаси эмас. Бу орқали хавфли вирус тарқалиши мумкин», — дейилади хабарда. Ҳукумат фуқароларни бундай вазиятларда эътиборли бўлишга чақирди.

Материалда қайси мамлакатлардан учиб келаётган «ғалати нарсалар» ҳақида гап кетаётгани ҳақида аниқ айтилмаган. Лекин Жанубий Корея фаоллари тарғибот материалларидан иборат ҳаво шарларини Шимолий Корея ҳудудига мунтазам равишда учириб туради. Охирги марта бундай вазият апрель ойининг охирида рўй берган эди.

Шунингдек, «Нодон синмун» газетасининг материалида фуқаролар мамлакат раҳбари Ким Чен Ин томонидан илгари сурилган карантин чораларига риоя қилишга даъват этилади. «Биз бу курашда енгиб чиқамиз, мамлакатимиз фаровонлигини ҳимоя қиламиз», — дейилади мақолада.

Газетанинг ёзишича, айнан қатъий карантин соғлиқни сақлаш соҳасидаги инқирозни бартараф этади. Мақола муаллифлари коронавирус муаммосини қисқа вақт ичида ҳал қилиб бўлмаслигини, яратилаётган вакциналар «вируснинг доимий мутациялари сабабли самарасиз» эканини таъкидлади.

«Нодон синмун» газетаси мамлакатда коронавирус билан касалланганлар бор-йўқлигига аниқлик киритмаган. Шу билан бирга, газета дунёнинг бошқа мамлакатларида COVID-19 билан касалланиш ҳолатлари, шунингдек, ҳукуматлар томонидан кўрилган қатъий чоралар ҳақида батафсил маълумот берган.

Февраль—март ойларида чет эллик дипломатлар ва уларнинг оила аъзолари Шимолий Кореяни тарк эта бошлади. Бир қатор элчихоналар ёпилди. Россия элчихонаси ходимлари уйга моторсиз темир йўл вагонлари билан қайтишга мажбур бўлди.

КХДР етакчиси Ким Чен Ин мамлакатда кенг миқёсда очарчилик бўлиши мумкинлигини тан олди. КХДРда вазиятнинг ёмонлашувидаги муҳим омиллардан бири бу чегаралар ёпилиши сабабли Хитой билан савдо ҳажмининг кескин пасайиши эди.