Shimoliy Koreya yetakchisi Kim Chen In mamlakatdagi vaziyat har qachongidan ham yomonroq ekanini tan oldi. Bu haqda Koreyaning Markaziy telegraf agentligiga tayanib “Interfaks” xabar berdi.

Foto: “RIA-Novosti”

“Partiya qurultoyining sotsialistik ish uslubimizni takomillashtirish, iqtisodiy ishlarda sezilarli o‘zgarishlarga va rivojlanishga erishish, odamlarning turmush darajasini yaxshilashga qaratilgan qarorlari ijrosi hatto misli ko‘rilmagan qiyinchiliklarni yengib o‘tishimiz kerak bo‘lgan bugungi eng yomon vaziyatda ham partiya qismlarining bajaradigan roliga bog‘liq”, — dedi Kim Chen In Koreya Mehnat partiyasi qismlari kotiblarining oltinchi konferensiyasida.

Shimoliy Koreya rahbari partiyaning quyi sinflarini aniqlanmagan “kamchiliklar” uchun tanqid qildi va partiya barqaror va sog‘lom rivojlanishi uchun ularni zudlik bilan tuzatishga chaqirdi. KXDRdagi partiya qismlari tarkibiga beshdan 30 tagacha odam kiradi. Bu partiyaning fabrikalar va boshqa joylardagi ishlarni nazorat qiluvchi eng kichik bo‘linmalaridir.

Associated Press mutaxassislarining fikricha, Shimoliy Koreya iqtisodiyotiga pandemiyaning zarbasi, shuningdek, o‘nlab yillar davomida noto‘g‘ri boshqaruv ta’siri va AQSh sanksiyalari Kim Chen Inni butun rahbarligi davridagi eng qiyin ahvolga solib qo‘ydi.

Fevral oyida Kim Chen In hukumatni mamlakatdagi iqtisodiy tanazzullar uchun tanqid qilgan va bosh iqtisodchini iqtisodiyotni saqlab qolish uchun yangi g‘oyalar taklif qilmagani sababli ishdan bo‘shatgan edi.

Tahlilchilarning fikricha, Shimoliy Koreya iqtisodiyotini jonlantirish uchun hukumat fabrikalarga zarur zamonaviy uskuna va texnologiyalarga sarmoya kiritishi, shuningdek, ko‘proq oziq-ovqat mahsulotlarini import qilishi yoki fermer xo‘jaliklari mahsuldorligini oshirishi kerak. BMT ma’lumotlariga ko‘ra, 2019-yilda KXDR aholisining 40 foizida oziq-ovqat taqchilligi kuzatilgan.