AQSh koronavirusga qarshi vaksinalarni patentlashdan voz kechishni qo‘llab-quvvatladi

AQSh prezidenti Jo Bayden ma’muriyati dori vositalari ishlab chiqarishdagi to‘siqlarni bartaraf etish maqsadida koronavirusga qarshi vaksinalarni patentlashdan voz kechishni qo‘llab-quvvatladi, deb yozadi “RBK”.

Jahon sog‘liqni saqlash tashkiloti (JSST) rahbari Tedros Gebreyesus AQSh ma’muriyatining ushbu qarorini mamnuniyat bilan qabul qildi va uni “global sog‘liqni saqlash muammolari bo‘yicha AQSh yetakchiligining kuchli namunasi” deb atadi.

JSST rahbari bir necha oydan buyon Jahon savdo tashkiloti (JST)dagi intellektual mulk huquqlari bo‘yicha muzokaralarni olib boruvchi mamlakatlarni favqulodda holatlarda foydalanishga ruxsat berilgan vaksinalar uchun patent qoidalarini to‘xtatib turishga undab keladi. AQSh esa azaldan bunga qarshi bo‘lib kelgan.

Muzokaralarda Vashington vakili Ketrin Tay 5-may kuni AQShning COVID-19 vaksinalari uchun intellektual mulk himoyasidan voz kechishni qo‘llab-quvvatlashi to‘g‘risida bayonot tarqatdi. “Pandemiya bilan bog‘liq favqulodda holatlar favqulodda choralarni talab qiladi”, — deyiladi unda.

CNBC xabariga ko‘ra, ushbu fonda vaksinalar ishlab chiqaradigan yirik farmatsevtika kompaniyalarining aksiyalari pasayib ketdi, masalan, Moderna aksiyasi 6,1 foiz, Johnson & Johnson esa 0,4 foizga arzonlashdi.

Avvalroq Bayden AQSh JSTning intellektual mulk huquqlaridan voz kechish haqidagi taklifini qo‘llab-quvvatlashini tasdiqlagan edi. Ushbu harakat vaksina sotib olish yoki emlash kampaniyasini boshlashga qiynalayotgan mamlakatlarda COVID-19’ga chalinish holatlarining osmonga chiqishi bilan bog‘liq.

Qarshilarning ta’kidlashicha, vaksinalarni patentlash va boshqa intellektual mulkni himoya qilish o‘ta ehtiyojmand mamlakatlar uchun ko‘proq dori ishlab chiqarishdagi asosiy to‘siq emas.

2020-yil oxirida Hindiston va Janubiy Afrika vaksina patentlarini vaqtincha bekor qilish tashabbusi bilan chiqqan edi. Ularni 60 ga yaqin mamlakat qo‘llab-quvvatlagan. Donald Tramp ma’muriyati esa bunga qarshi chiqqan.