O‘zbekistonda 2021-yilning 3 oyida qancha sement ishlab chiqarilgani ma’lum qilindi

O‘zbekistonda 2021-yilning dastlabki 3 oyida yirik korxonalar tomonidan 2,2 million tonna sement ishlab chiqarildi. Bu haqda Davlat statistika qo‘mitasiga tayanib, “Xabar.uz” xabar berdi.

Ma’lum qilishicha, 2020-yilning mos davriga nisbatan mahsulot ishlab chiqarish hajmi 14,1 foizga oshgan:

• 2021-yilning yanvar oyida 559,3 ming tonna (o‘sish sur’ati 107,3 foiz);
• 2021-yilning yanvar—fevral oylarida 1,3 million tonna (o‘sish sur’ati 118,4 foiz).

Sement ishlab chiqarish korxonalari tomonidan respublika miqyosida ishlab chiqarilgan mahsulotlarning jami hajmida eng yuqori ulush Navoiy viloyatida — 41 foiz, Toshkent viloyati —40,5 foiz hamda Farg‘ona viloyati —9,6 foiz hissasiga to‘g‘ri kelgan.

Avvalroq 2021-yilning yanvar—fevral oylarida xorijdan O‘zbekistonga 528,5 ming tonna sement import qilingani, 2021-yil 1-apreldan 1-oktabrgacha sement mahsulotini (TIF TN kodi 2523) O‘zbekistonga olib kirishda bojxona bojining nol stavkasi qo‘llanilishi to‘g‘risida xabar berilgandi.

Eslatib o‘tamiz, mart boshida uy-joy qurilishi va ipoteka bozorini rivojlantirishga bag‘ishlangan yig‘ilishda bosh vazirning birinchi o‘rinbosari Ochilboy Ramatov Prezidentdan korxonalarga sement va metallni ishlab chiqaruvchilardan to‘g‘ridan to‘g‘ri sotib olishga ruxsat so‘ragan. U o‘z taklifini 2021-yilda qurilish ishlari hajmi ikki barobarga oshishi, qurilish materiallariga bo‘lgan talab esa narxning oshishiga olib kelishi bilan asoslagan. Shavkat Mirziyoyev taklifni yaxshilab o‘rganib chiqish va shaffof tizim yaratish zarurligini ta’kidlagan.