Buxoro shahrida 51 yoshli ayol o‘zini 8-qavatdan tashlamoqchi bo‘ldi. Voqea joyiga yetib kelgan IIB xodimi harakati bilan ko‘ngilsizlikning oldi olindi. Bu haqda “Daryo”ga viloyat IIB mas’ul xodimi Quvvat Yarashov xabar berdi.
Ta’kidlanishicha, voqea bugun, 3-may kuni soat, taxminan, 10:00 da sodir bo‘lgan.
Aytilishicha, Buxoro shahridagi “Fayzulla Xo‘jayev” MFYda yashovchi 51 yoshli ayol N.N. ruhiyatidagi o‘zgarishlar sabab o‘zini shahardagi Ibrohim Mo‘minov ko‘chasida joylashgan qurilishi tugallanmagan sakkiz qavatli binoning 8-qavatidan tashlamoqchi bo‘lgan. Shahar ichki ishlar organlari faoliyatini muvofiqlashtirish boshqarmasi 2-son IIB profilaktika katta inspektori, katta leytenant Izzat Mirzayev voqeadan xabar topgan va zudlik bilan voqea joyiga yetib borgan.
IIB xodimi ayolga psixologik tushuntirish bergach, ayol o‘zini tashlash fikridan qaytgan. Shunda xodim ayolni chaqqonlik bilan ushlab olgan va holatning oldini olgan. Voqeadan so‘ng ayolga tibbiy-psixologik yordam ko‘rsatilgan. Ayni paytda voqea sabablari o‘rganilmoqda.
Izoh (0)