Ўзбекистонда 2021 йилнинг 3 ойида қанча цемент ишлаб чиқарилгани маълум қилинди

Ўзбекистонда 2021 йилнинг дастлабки 3 ойида йирик корхоналар томонидан 2,2 миллион тонна цемент ишлаб чиқарилди. Бу ҳақда Давлат статистика қўмитасига таяниб, «Xabar.uz» хабар берди.

Маълум қилишича, 2020 йилнинг мос даврига нисбатан маҳсулот ишлаб чиқариш ҳажми 14,1 фоизга ошган:

• 2021 йилнинг январь ойида 559,3 минг тонна (ўсиш суръати 107,3 фоиз);
• 2021 йилнинг январь—февраль ойларида 1,3 миллион тонна (ўсиш суръати 118,4 фоиз).

Цемент ишлаб чиқариш корхоналари томонидан республика миқёсида ишлаб чиқарилган маҳсулотларнинг жами ҳажмида энг юқори улуш Навоий вилоятида — 41 фоиз, Тошкент вилояти —40,5 фоиз ҳамда Фарғона вилояти —9,6 фоиз ҳиссасига тўғри келган.

Аввалроқ 2021 йилнинг январь—февраль ойларида хориждан Ўзбекистонга 528,5 минг тонна цемент импорт қилингани, 2021 йил 1 апрелдан 1 октябргача цемент маҳсулотини (ТИФ ТН коди 2523) Ўзбекистонга олиб киришда божхона божининг нол ставкаси қўлланилиши тўғрисида хабар берилганди.

Эслатиб ўтамиз, март бошида уй-жой қурилиши ва ипотека бозорини ривожлантиришга бағишланган йиғилишда бош вазирнинг биринчи ўринбосари Очилбой Раматов Президентдан корхоналарга цемент ва металлни ишлаб чиқарувчилардан тўғридан-тўғри сотиб олишга рухсат сўраган. У ўз таклифини 2021 йилда қурилиш ишлари ҳажми икки баробарга ошиши, қурилиш материалларига бўлган талаб эса нархнинг ошишига олиб келиши билан асослаган. Шавкат Мирзиёев таклифни яхшилаб ўрганиб чиқиш ва шаффоф тизим яратиш зарурлигини таъкидлаган.