Andijon shahrida yashovchi fuqaro Zuhra Qayumova hududdagi 13-sonli aqli zaif bolalar uchun ixtisoslashtirilgan maktab-internatida farzandi muassasa tarbiyachisi tomonidan kaltaklanganini ma’lum qilgandi. “Daryo” muxbiri holatga aniqlik kiritgach, bu haqda jurnalistik surishtiruv ham e’lon qilingandi.
Maqolada murojaatchi farzandining tug‘ma nogiron ekanligini, o‘qituvchi va tarbiyachilari farzandi ustidan doimiy shikoyat qilib kelishi, shu kunga qadar kunora farzandining turli joylari ko‘karib borgan bo‘lsa-da, hech kimga e’tiroz qilmagani, lekin so‘nggi marotaba maktabdan olib ketganida bolasining ikkala qo‘li va badanining ayrim qismlari ko‘karib ketgani, bu bo‘yicha profilaktika inspektori va maktab ma’muriyatiga chora ko‘rishini so‘rab murojaat qilgani, biroq hech kim bu masala bo‘yicha jiddiy shug‘ullanmaganligini ta’kidlagandi.
Mazkur surishtiruv ortidan 2021-yilning 19-aprel kuni “Sevimli” kanalining “Zamon” informatsion dasturi orqali “Da’vo tasdiqlanmadi” deya telelavha efirga uzatildi.
Lavhada “Sevimli” muxbiri holatni o‘rganish maqsadida maktabga borganligini, o‘sha kungi holat yuzasidan maktab ma’muriyati bilan suhbatlashilganligi, tarbiyachiga chora ko‘rilganligi ta’kidlanadi.
“Daryo” muxbiri bilan suhbatlashishdan bosh tortgan tarbiyachi “Sevimli” muxbiriga onaning da’vosi aqliga sig‘dira olmasligini bildirgan.
“Muassasadagi barcha xodimlar bolalarni yaxshi ko‘ramiz. Bu yerda ishlashdan oldin bolani psixikasini bilish kerakligi doimiy o‘rgatiladi. Bolani turtkilash yoki urish.... Eshitib o‘zim ham hayron qoldim. Bu da’volar aqlga sig‘maydi”, — deydi Saida Qoraboyeva.
Lavhada B.M.ning onasi intervyu berishdan bosh tortganligini qayd etib, maktabga farzandlarini olish uchun kelgan boshqa ota-onalari bilan suhbatlashganini ko‘rish mumkin.
Zuhra Qayumova lavha efirga uzatilgan kunda unga mazkur holat yuzasidan hech kim qo‘ng‘iroq qilmaganligini, farzandini maktabdan olib ketish uchun borganida ham hech qanday jurnalistlarga ko‘zi tushmaganligini aytmoqda.
“Lavhada muxbir qiz meni intervyu berishdan bosh tortganimni aytdi. To‘g‘risi shuni eshitib, o‘zimga kelolmayapman. Axir men u bilan uchrashmagan bo‘lsam. Bundan tashqari saytda maqola chiqqandan so‘ng menga hech kim qo‘ng‘iroq qilmagan va holat yuzasidan hech narsa so‘ramagan bo‘lsa, qanday qilib ular bilan suhbatlashishdan bosh tortaman. Aloqaga chiqishgan bo‘lganida maktabga borolmasam ham telefon orqali hammasini tushuntirib berardim. Biz ishongan ‘Zamon’dagilarning faqat bir tomonni eshitgani juda ham qiziq?”, — deydi Zuhra Qayumova.
Andijon viloyat xalq ta’limi boshqarmasi matbuot xizmati xodimi Umarxo‘ja Madaminov “Zamon” muxbiriga tibbiy ekspertiza xulosasi yo‘qligi sababli tarbiyachiga hech qanday chora ko‘rilmasligini aytgan.
“Ijtimoiy tarmoqlarda chiqqan xabarlarga shuni bildirib o‘tamizki, haqiqatan o‘qituvchi bolaga tan jarohati yetkazgan bo‘lganida tibbiy ekspertiza xulosasini berishgan bo‘lardi. Biroq hanuzgacha bolaning onasi ekspertiza xulosasi bo‘yicha hech qanday ma’lumot bermadi. Agarda haqiqatan tan jarohati yetkazilgan bo‘lsa, isbotlovchi ma’lumotlarni taqdim etadigan bo‘lsa, har qanday holatda xodimga chora ko‘rishga tayyormiz. Lekin mana oradan bir yarim oy o‘tgan bo‘lsa-da qo‘limizda asosli hujjat yo‘q”,— deydi Umarxo‘ja Madaminov.
Qayumovaning aytishicha, profilaktika inspektori sud-tibbiy ekspertizasi xulosasi kelishi bilan o‘rganish olib borib, natijasi bo‘yicha xalq ta’limi boshqarmasiga ma’lumot kiritishini bildirgan. Biroq ish yuzasidan huquq tartibot xodimi hech qanday harakatni amalga oshirmagan.
“Ekspertiza xulosasini bersa chora ko‘ramiz, deyishyapti. Axir mana bir oydirki, shu xulosani ololmayapman. Laboratoriyaga borsam berganmiz deydi. Profilaktika inspektoriga bir necha marotaba murojaat qilsam xulosani olishimga viloyat xalq ta’limi boshqarmasiga holat yuzasidan ma’lumot kiritishini aytardi. Shunda nahotki bitta ekspertiza xulosasi shuncha cho‘zilsa degan fikrlar meni qiynardi. Keyin bilsam, inspektor xulosani olgan, lekin ishni yopdi-yopdi qilgan ekan”,— deydi Zuhra Qayumova.
“Daryo” muxbiri viloyat ichki ishlar boshqarmasi axborot xizmati xodimlari yordamida Andijon shahar 4-son ichki ishlar bo‘limidan Respublika sud-tibbiy ekspertiza ilmiy-amaliy markazi Andijon filiali tomonidan berilgan ekspertiza xulosasini olishga muvaffaq bo‘ldi.
Ekspert xulosasida “Bolaning badanida tan jarohatlari mavjudmi, agar mavjud bo‘lsa joylashuv mexanizmi, lokalizatsiyasi va og‘irlik darajasini aniqlash?”, “Tan jarohatlari qanday buyum ta’sirida yetkazilgan?”, “Tan jarohatlari yiqilib tushishi yoki o‘ziga o‘zi yetkazishi oqibatida olishi mumkinmi?” kabi savollarga javob berilgan.
Xulosada 2021-yilning 2-mart kuni soat 11:20 da filialning ambulatoriya xonasida bola sud tibbiy ekspertizadan o‘tkazilganligi, u bilan suhbatlashmoqchi bo‘linganida muloqotga kirisha olmaganligi qayd qilingan. Shuningdek, ko‘rik vaqtida o‘ng yelka tashqi yuqori sohasida oval shaklda, 3,5x2,5, 2,1,4 va 1,x1,2 sm, chap yelka tashqi yuqori sohada oval shaklda 3x2 sm o‘lchamda qontalashlar borligi aniqlanganligi bildirilgan.
Ekspert S.Zuhritdinova profilaktika inspektorining savollariga quyidagicha javob bergan:
“Ushbu tan jarohatlari qattiq to‘mtoq buyum ta’siri natijasida yetkazilgan bo‘lib, yetkazilish muddati qarorda, ekspertizadan o‘tuvchi shaxsni onasi ko‘rsatgan vaqtga to‘g‘ri kelishi mumkin. Ushbu tan jarohatlari sog‘liqning qisqa muddatga buzilishiga olib kelmaydigan yengil tan jarohatlar ta’siriga kiradi va bu jarohatlarning davomiyligi olti kundan ortiq bo‘lmagan, tez o‘tib ketuvchi oqibatli hisoblanadi. Aniqlangan tan jarohatlarining joylashgan joyi, xususiyatiga ko‘ra jarohatni o‘ziga o‘zi yetkazish yoki o‘zi yiqilib tushishi natijasida olishi mumkinligi inkor etiladi”, — deyiladi ekspert xulosasida.
“Hozir men ham jabrlanuvchi, ham ayblanuvchiga aylanib qolyapman. O‘zi farzandimni zo‘rg‘a, asrab-avaylab katta qilayotgan bo‘lsam, qanday qilib men uni o‘zim urib, birovga to‘nkashim mumkin. Meni birorta o‘qituvchi yoki tarbiyachilarga xusumatim yo‘q. Aksincha, nogiron farzandimga bunaqa munosabatda bo‘lganliklari uchun jahlim chiqyapti, yuragim og‘riyapti. Bugun mening bolam bilan yuz bergan bo‘lsa, ertaga boshqaning farzandiga ham bunday munosabatda bo‘lmaydi, deb kim ayta oladi? Imkoniyati cheklangan bu bolalarda nima ayb?”, — deydi Qayumova
Zuhra Qayumovaning aytishicha, telefon orqali muloqot davomida Umarxo‘ja Madaminov “Sevimli” telekanalidagi lavhaga izoh berib, “Daryo” muxbirini ikkinchi tarafni o‘rganmasdan material tayyorlaganlikda ayblagan. Vaholanki, “Daryo”da e’lon qilingan surishtiruvda murojaat qiluvchi fuqaro bilan birga maktab direktorining o‘quv ishlari bo‘yicha o‘rinbosari Gulnora Asqarova hamda boshlang‘ich sinf o‘qituvchisi Sohiba Najmiddinovalarning fikrlari eshitilgan edi.
“Daryo” voqealar rivojini kuzatishda davom etadi.
Izoh (0)