Sirdaryo viloyatida 2020-yil 1-may kuni yuz bergan texnogen falokat va undan keyin kuzatilgan suv toshqinidan eng ko‘p jabr ko‘rgan Sardoba, Oqoltin va Mirzaobod tumanlarida yangi tug‘ilgan chaqaloqlarga ofatdan omon qolganlik, balodan qutulganlik ma’nosini bildiruvchi ismlarni qo‘yish holatlari ko‘paydi. Bu haqda “Daryo” so‘roviga asosan Davlat xizmatlari agentligining Sirdaryo viloyati boshqarmasi Jamoatchilik va OAV bilan aloqalar sho‘basi ma’lum qildi.
Ma’lum qilishlaricha, Sardoba suv toshqinidan oldingi bir yilda — 2019-yilning 1-mayidan 2020-yilning 1-mayigacha bo‘lgan davrda Oqoltin tumanida 14 nafar, Sardoba tumanida 12 nafar va Mirzaobod tumanida 8 nafar — jami 34 qizaloqqa Shukrona deb ism qo‘yilgan.
Toshqindan keyingi bir yil davomida — 2020-yil 1-maydan 2021-yil 1-maygacha bo‘lgan davrda esa Oqoltin tumanida 33 nafar, Sardoba tumanida 17 nafar va Mirzaobodda 15 nafar — jami 65 nafar qizga Shukrona ismi berilgan; Shukronalar bir yilda salkam ikki barobarga ko‘paygan.
“O‘g‘il bolalarga asosan Muhammadali, Muhammadziyo, Abdulloh ismlari qo‘yilgan, Shukrullo va Shukr ismlari uchramadi”, — deyiladi DXA Sirdaryo viloyati boshqarmasi axborotida. Qayd etish joiz, “Daryo” muxbirlari Xalosboy ismli bolakayning qarindoshlari bilan suhbatda bo‘ldi — unga “toshqindan eson-omon xalos bo‘ldik” degan niyatda shunday ism qo‘yilgan.
Izoh (0)