Navoiyda o‘zganing yer maydonini 47 mln so‘mga sotib yubormoqchi bo‘lgan shaxs qo‘lga tushdi

Navoiyda o‘ziniki bo‘lmagan yer maydonini sotib yubormoqchi bo‘lgan shaxs ushlandi, deya “Daryo”ga xabar qilmoqda Davlat xavfsizlik xizmati.

Ma’lum qilinishicha, Navoiy viloyatining Navbahor tumanida yashovchi fuqaro o‘zi vaqtinchalik foydalanib kelgan mahalliy tadbirkor nomidagi baliqchilik xo‘jaligiga mo‘ljallangan 1,75 gektar yer maydonini uning egasini xabardor qilmasdan, boshqa bir fuqaroga 47 million so‘mga sotishni rejalashtirgan.

DXX Navoiy viloyati boshqarmasi va Iqtisodiy jinoyatlarga qarshi kurashish departamentining hududiy boshqarmasi xodimlari tomonidan o‘tkazilgan tezkor tadbirda firibgar shaxs so‘ralgan puldan 35 million so‘mni olgan vaqtida ushlangan.

Bundan avval Andijonda 6 gektar yerni 18 ming dollarga sotmoqchi bo‘lgan fermer xo‘jaligi rahbariga jinoyat ishi qo‘zg‘atilgani, To‘rtko‘lda fuqaroga 30 million so‘mga 10 gektar yer olib berishni va’da qilgan shaxs ushlangani hamda Toshkent viloyatida qariyb 160 gektar yer noqonuniy o‘zlashtirib olingani aniqlangani haqida xabar berildi.