Toshkent viloyatida qariyb 160 gektar yer noqonuniy o‘zlashtirib olingani aniqlandi

Bosh prokuratura tomonidan Toshkent viloyatida sug‘oriladigan yerlarni noqonuniy o‘zlashtirish va ushbu hududlarda turli xil obyektlarni qurish holatlarini aniqladi. Bu haqda “O‘zbekiston 24” telekanalida tomonidan e’lon qilingan reportajda so‘z boradi.

2021-yil boshidan buyon viloyatda 159 gektar yer uchastkalarini noqonuniy o‘zlashtirishga bog‘liq 416 ta holat aniqlangan. Ushbu hududlarning 88 gektariga 789 ta obyekt noqonuniy qurilgan. Ayni vaqtda ularning 63 gektar hududdagi 517 tasi buzib tashlangan.

Masalan, Qibray tumanida 2019-yilda fermer xo‘jaliklarini tashkil etish uchun yer ajratilgan, biroq shu yilning o‘zida yerlar tuman hokimligi zaxirasiga qaytarilgan. Keyinroq hokim qarori bilan yerlar “Nerudnik Iris” bog‘-uzumchilik sherikchiligiga berilgan.

Korxona rahbari 9 sotix yerni 17 nafar fuqaro mustaqil inshoot qurishi uchun o‘zboshimchalik bilan ajratib bergan. Toshkent viloyati hokimligini aniqlik kiritishicha, ishlar tuman hokimligini ruxsatisiz, arxitektura va qurilish normalarini qo‘pol buzgan holda boshlangan. Hududlar beton devor bilan chegaralangani sabab qishloq xo‘jaligi yerlar foydalanishga yaroqsiz holga kelib qolgan.

“Qishloq xo‘jaligiga bo‘lingan yerlar auksionga qo‘yilmaydi. Tegishli korxonalar u yerda qurilish belgilashga yoki biror ko‘rsatma berishga haqli emas”, — deydi Qibray hokimi Mira’zam Mirqosimov.

Prokuratura talabiga ko‘ra, huquqbuzarlar o‘zboshimchalik bilan qurgan inshootlarini o‘zlari buzgan, yerlar hokimlikka qaytarilgan.

Qishloq xo‘jaligi yerlarida binolar qurish qishloq xo‘jaligida yer va suv resurslaridan samarali foydalanish chora-tadbirlari to‘g‘risidagi farmoni bilan taqiqlangan.

Avvalroq O‘zbekistonda yer uchastkalari bo‘yicha qonunbuzarliklar haqida xabar bergan fuqarolarga pul mukofoti berilishi to‘g‘risida xabar berilgandi.