Samarqand viloyati hozircha Rossiyaning “Sputnik V” vaksinasisiz qoladi. Chunki viloyatda uni saqlash uchun zarur bo‘lgan muzlatkichlar mavjud emas. Bu haqda “Samarkandskiy vestnik” nashri xabar berdi.
Samarqand viloyati Sanitariya-epidemiologiya ta’minoti va jamoat salomatligi boshqarmasi Immunoprofilaktika bo‘limi boshlig‘i Shoira Xalilovaning so‘zlariga ko‘ra, viloyatdagi tibbiyot muassasalarida (oilaviy poliklinikalar, qishloq vrachlik punktlari) rus vaksinasini saqlash uchun muzlatkichlar hanuzgacha mavjud emas. Qo‘llanmaga ko‘ra, vaksinalar -20 darajada saqlanishi kerak.
“Viloyatdagi muzlatkichlar faqatgina +2 dan +8 darajagacha bo‘lgan haroratni saqlashga qodir”, – dedi Shoira Xalilova.
Eslatib o‘tamiz, 27-aprel kuni O‘zbekistonga “Sputnik V” vaksinasining ikkinchi partiyasi 50 ming dozada olib kelindi. Shuningdek, 23-aprelga o‘tar kechasi O‘zbekistonga “Sputnik V” vaksinasining birinchi partiyasi yetkazib berilgan edi (aynan qancha miqdorda vaksina olib kelingani ma’lum qilinmagan). Qayd etish joiz, O‘zbekistonga aholini emlash uchun olib kelinadigan “Sputnik V”ning yarmini tadbirkor Alisher Usmonov moliyalashtirgan. Oldinroq ushbu vaksinadan jami 1 million doza sotib olinishi ko‘zda tutilgani ma’lum qilingan edi.
Izoh (0)