O‘zbekiston mustaqilligining 30 yilligi arafasida Qarshidagi Mustaqillik maydonida balandligi 62,5 metrga teng davlat bayrog‘i o‘rnatiladi, deb xabar bermoqda “Qashqadaryo” gazetasi.
Qayd etilishicha, ayni paytda maydonning amfiteatr oldidagi xiyobon bilan tutash qismida ulkan bayroq ustuni poydevori qurilmoqda. Ushbu obyektning buyurtmachisi Qarshi shahar obodonlashtirish boshqarmasi, pudratchisi esa “Voha maxsus montaj servis” mas’uliyati cheklangan jamiyat.
Korxona vakillarining aytishicha, bayroqning ustuni (flagshtok) diametri 430 millimetrdan 1220 millimetrgacha bo‘lgan po‘lat quvurlardan tashkil topadi. Uning barcha butlovchi qismlari maxsus buyurtma asosida Toshkentdagi “Bektemir metall konstruksiyalari” qo‘shma korxonasi tomonidan tayyorlab qo‘yilgan.
Bichimi 25 metrga 10 metrdan iborat bayroqning o‘zi esa Farg‘ona vodiysidagi ishlab chiqarish korxonalaridan birida tikilgan. Shartnomalarda ko‘zda tutilgan mablag‘ o‘tkazilishi bilanoq hamkorlar ularni maxsus texnikalar yordamida viloyat markaziga yetkazib beradi.
Loyihaga ko‘ra, davlat bayrog‘i o‘rnatilgach, uning atrofidagi 2 ming kvadrat metrlik hudud obodonlashtirilib, maysazor va gulzorlar barpo etiladi, manzarali daraxtlar ekiladi va yangi yo‘lakbop plitkalar terib chiqiladi. Mustaqillik maydonining shu qismida bayroqning tarixi va tavsifi aks etgan tosh lavhlar ham o‘rnatiladi.
Ochiq manbalardan olingan ma’lumotlarga qaraganda, Qarshi shahridagi davlat bayrog‘ining birgina ustunini bunyod etishga 1 milliard 350 million so‘m mablag‘ sarflanadi.
Ma’lumot uchun, O‘zbekistondagi eng baland davlat bayrog‘i 2019-yilda Farg‘onada o‘rnatilgan. Uning balandligi 67 metr bo‘lib, hajmi 20 metrga 10 metrdir. Toshkent shahrida 65 metr, Toshkent viloyatida 50 metr, Andijonda 64 metr, Buxoroda 65 metr, Navoiyda 62,5 metr, Namanganda 35-metr, Samarqandda 60 metr va Urgutda 62 metr, Qashqadaryoning Dehqonobod tumanida 40 metr balandlikda bayroq o‘rnatilgan.
Izoh (0)