Toshkentda 27-apreldan bog‘cha xodimlari va maktab o‘qituvchilarini ZF-UZ-VAC 2001 vaksinasi bilan emlash boshlandi. Bu haqda Toshkent shahar Sog‘liqni saqlash boshqarmasi boshlig‘i o‘rinbosari Ulug‘bek Egamberdiyev xabar berdi.
“Toshkent shahrida joylashgan jami 83 ta emlash punktida bugungi kunga qadar 65 yoshdan yuqori hamda tibbiyot xodimlarining jami 37 763 nafari emlash bilan qamrab olindi. Ulardan 18 980 nafari 65 yoshdan yuqori bo‘lgan fuqarolar, 18 883 nafari esa tibbiyot xodimlarini tashkil etgan.
Bugun (27-aprel)dan boshlab Toshkent shahri bo‘yicha xitoy-o‘zbek ZF-UZ-VAC 2001 vaksinasi bilan nafaqat 65 yoshdan yuqori va tibbiyot xodimlari, balki maktabgacha ta’lim muassasasi xodimlari, maktab o‘qituvchilari hamda surunkali kasalligi bo‘lgan boshqa fuqarolarni ham emlash boshlandi”, – deydi Ulug‘bek Egamberdiyev.
Shuningdek, boshqarma boshlig‘i o‘rinbosarining ma’lum qilishicha, 28-apreldan Toshkent aholisining 65 yoshdan oshgan qatlamini O‘zbekistonga olib kelingan “Sputnik V” vaksinasi bilan emlash ishlari boshlanadi. Emlash bepul amalga oshiriladi.
Ma’lumot uchun, O‘zbekistonda 1-apreldan 65 yoshdan katta shaxslar va tibbiyot xodimlarini koronavirusga qarshi o‘zbek-xitoy ZF-UZ-VAC2001 va AstraZeneca vaksinalari bilan emlash jarayoni boshlangan edi. 26-aprel holatiga ko‘ra, butun mamlakat bo‘yicha 565 mingdan ortiq fuqaro koronavirusga qarshi emlangan. Hukumat iyun oyi oxirigacha 4 millionga yaqin, yil oxirigacha 7 million aholini koronavirusga qarshi emlashni rejalashtirgan.
Izoh (0)