Ўзбекистон мустақиллигининг 30 йиллиги арафасида Қаршидаги Мустақиллик майдонида баландлиги 62,5 метрга тенг давлат байроғи ўрнатилади, деб хабар бермоқда «Қашқадарё» газетаси.
Қайд этилишича, айни пайтда майдоннинг амфитеатр олдидаги хиёбон билан туташ қисмида улкан байроқ устуни пойдевори қурилмоқда. Ушбу объектнинг буюртмачиси Қарши шаҳар ободонлаштириш бошқармаси, пудратчиси эса «Воҳа махсус монтаж сервис» масъулияти чекланган жамият.
Корхона вакилларининг айтишича, байроқнинг устуни (флагшток) диаметри 430 миллиметрдан 1220 миллиметргача бўлган пўлат қувурлардан ташкил топади. Унинг барча бутловчи қисмлари махсус буюртма асосида Тошкентдаги «Бектемир металл конструкциялари» қўшма корхонаси томонидан тайёрлаб қўйилган.
Бичими 25 метрга 10 метрдан иборат байроқнинг ўзи эса Фарғона водийсидаги ишлаб чиқариш корхоналаридан бирида тикилган. Шартномаларда кўзда тутилган маблағ ўтказилиши биланоқ ҳамкорлар уларни махсус техникалар ёрдамида вилоят марказига етказиб беради.
Лойиҳага кўра, давлат байроғи ўрнатилгач, унинг атрофидаги 2 минг квадрат метрлик ҳудуд ободонлаштирилиб, майсазор ва гулзорлар барпо этилади, манзарали дарахтлар экилади ва янги йўлакбоп плиткалар териб чиқилади. Мустақиллик майдонининг шу қисмида байроқнинг тарихи ва тавсифи акс этган тош лавҳлар ҳам ўрнатилади.
Очиқ манбалардан олинган маълумотларга қараганда, Қарши шаҳридаги давлат байроғининг биргина устунини бунёд этишга 1 миллиард 350 миллион сўм маблағ сарфланади.
Маълумот учун, Ўзбекистондаги энг баланд давлат байроғи 2019 йилда Фарғонада ўрнатилган. Унинг баландлиги 67 метр бўлиб, ҳажми 20 метрга 10 метрдир. Тошкент шаҳрида 65 метр, Тошкент вилоятида 50 метр, Андижонда 64 метр, Бухорода 65 метр, Навоийда 62,5 метр, Наманганда 35-метр, Самарқандда 60 метр ва Ургутда 62 метр, Қашқадарёнинг Деҳқонобод туманида 40 метр баландликда байроқ ўрнатилган.
Изоҳ (0)