Ijtimoiy tarmoqlarda Sariosiyo—Toshkent yo‘nalishida harakatlanuvchi №681 sonli yo‘lovchi poyezdida birinchi tibbiy yordam ko‘rsatish uchun dori vositalari, aptechka, tibbiy bilimga ega biror shaxs yo‘qligi bois, bir keksa ayolning tobi qochib vafot etganligi haqida xabar tarqaldi. Ushbu xabar yuzasidan “O‘ztemiryo‘lyo‘lovchi” izoh berdi.
Ma’lum qilinishicha, 2021-yilning 25-aprel kuni №681 sonli Sariosiyo—Toshkent yo‘nalishida harakatlanuvchi yo‘lovchi poyezdning 17-vagoni 30-o‘rindig‘iga Sariosiyo bekatidan 1961-yil 15-sentabrda tavallud topgan yo‘lovchi B.G. qizi va o‘g‘lining hamrohligida Toshkent shahriga yo‘lga chiqqan.
Yo‘lovchi B.G. vagonga chiqayotgan vaqtida ahvoli og‘ir ekanligini inobatga olib vagon kuzatuvchilari Salimov Kozim, Ilhomov Qodirlar tomonidan yo‘lovchiga amaliy yordam berilgan va har bir temiryo‘l bekatida tibbiyot xodimlari vagonga chaqirtirilgan. Yo‘l safari davomida B.G.ning ahvoli keskin ravishda og‘irlashib, Denov, Qumqo‘rg‘on, Boysun, Darband vokzallarida tibbiyot xodimlari tomonidan birinchi tibbiy yordam ko‘rsatilgan.
Qumqo‘rg‘on tibbiyot punkti navbatchi feldsheri Mengnorov Abduvohid soat 18:20 larda Sariosiyo—Toshkent yo‘lovchi poyezdining 17-vagonidagi bemor B.G.ga birinchi tez tibbiy yordam ko‘rsatayotgan vaqtida bemorning qizi onasi B.G.ning jigar sirrozi kasalligi bilan og‘riganini aytadi. Buni u o‘z tushuntirish xatida ham bayon qilgan.
Darband vokzali hamshirasi Normamatova Nargiza Sariosiyo—Toshkent yo‘lovchi poyezdining 17-vagonida bemor ayolga birinchi tibbiy yordam ko‘rsatish vaqtida bemorning farzandlariga bemorni yo‘lovchi poyezdidan tushirib olib qolishni aytgan, bemorning o‘g‘li poyezddan tushib qolishga rozi bo‘lmagan. Bemorning o‘g‘li buni o‘z tushuntirish xatida ham bayon qilgan.
Temiryo‘l bekatlarida birinchi tibbiy yordam ko‘rsatilishiga qaramasdan, mazkur poyezd Oqrabot temiryo‘l bekatiga yaqinlashayotganida tobi qochgan bemor yo‘lovchi olamdan o‘tgan.
“Bugungi kunda ‘O‘zbekiston temir yo‘llari’ AJga qarashli barcha poyezdlarda tibbiyot qutilari (aptechkalar), birinchi yordam ko‘rsatish uchun dori-darmonlar bilan ta’minlangan. Bundan tashqari, har bir stansiyada tibbiyot xonalari mavjud, ularda kecha-yu kunduz tibbiyot xodimlari faoliyat olib boradi.
Shuningdek, ayni kunda yo‘lovchi poyezdlarni texnik va texnologik yo‘lga tayyorlash korxonasida 100 ga yaqin tibbiyot qutilari zaxira qilingan. Ular dori vositalari bilan to‘ldirilib, foydalanish muddati doimiy ravishda nazorat qilib boriladi.
Shu bois fuqarolarimizdan ijtimoiy tarmoqlarda asossiz ma’lumotlarni tarqatmasliklarini so‘rab qolamiz”, – deyiladi kompaniya xabarida.
Bundan avval Toshkentda o‘z joniga qasd qilmoqchi bo‘lgan qiz o‘zini poyezd ostiga tashlagani, Toshkent viloyatida Lacetti yuk poyezdiga to‘qnashib, ag‘darilib ketgani hamda Toshkent metropoliteni “3-bekat” tablosida paydo bo‘lgan uyatsiz yozuv yuzasidan izoh bergani haqida xabar berilgandi.
Izoh (0)