Qashqadaryodagi qamoqxonada 30 yoshli mahkum o‘zini osib qo‘ydi. Uning qarindoshlari mahkum o‘z joniga qasd qilganiga shubhalanmoqda. Senat ishni nazoratga oldi.
Voqea haqida “Kun.uz”da ma’lum qilingan. Unda Qashqadaryoda jazo muddatini o‘tayotgan mahkumlardan biri o‘zi tug‘ilib o‘sgan Namangan viloyatidagi manzilli koloniyaga o‘tkazilishi arafasida 2021-yilning 28-mart kuni Qashqadaryo viloyat IIB Jazoni ijro etish bo‘limi 2-son koloniyasi ishlab chiqarish korxonasining omborxonasi to‘siniga telefon kabeli bilan o‘zini osib, joniga qasd qilib vafot etgani ma’lum qilingan.
Marhumning yaqinlari uning o‘z joniga qasd qilgani haqidagi rasmiy izohlarga shubha bilan qaramoqda. Mahkumning onasi o‘g‘li shu yilning 26-mart kuni jazo muddatini o‘tayotgan Qarshi shahri Shayxaliqo‘rg‘oni qamoqxonasida vafot etganini aytmoqda.
Muassasa ma’muriyati o‘lim sababini “o‘z joniga qasd qilish” deb ko‘rsatgan. Ammo marhumning qarindoshlari va uning onasi tomonidan jasadni ko‘zdan kechirgandan so‘ng u o‘zini-o‘zi osganligiga shubha bilan qarab, qaytadan ekspertiza qildirmoqchi bo‘lganida, jasad oldin ekspertizadan o‘tganligi va ular qayta ekspertiza qilmasligini aytib rad javobini bergan.
Mazkur holat yuzasidan Bosh prokuratura va Ichki ishlar vazirligi xodimlari tomonidan berilgan ma’lumotlarda Qashqadaryo viloyati maxsus prokuraturasi tomonidan tergovga qadar tekshiruv harakatlari olib borilayotgani bildirilgan.
Ushbu holat senatorlar e’tiboridan chetda qolmadi. Shu sababli Senatning Sud-huquq masalalari va korrupsiyaga qarshi kurashish qo‘mitasi IIVdan mazkur holatni nazoratga olish va puxta o‘rganib chiqish hamda natijasi yuzasidan rasmiy bayonot berishni so‘radi.
Izoh (0)