Ispaniyaning Pamplona shahri rahbari Enrike Mayya koronavirus pandemiyasi sababli ketma-ket ikkinchi yil San-Fermin festivalini bekor qildi, deb yozmoqda “Interfaks”.
“Afsuski, men 2021-yilda ham San-Fermin festivalini rasman bekor qilishga majburman”, — deb Mayyaning so‘zlaridan iqtibos keltirdi OAV.
Uning ta’kidlashicha, bu qaror koronavirus tarqalishining yuqori xavfi va mintaqadagi vaksinatsiyaning past darajasi bilan bog‘liq.
Ma’lumot uchun, San-Fermin Pamplonada har yili 6—14-iyun kunlari o‘tkaziladigan festival bo‘lib, marosim 6-iyunda, avliyo Fermin kunining yarmida boshlanadi. Bayram, birinchi navbatda, ensyerro (12 bosh quturgan buqadan qochish) tufayli mashhur hisoblanadi. 1924-yilda 15 nafar ishtirokchi tadbir davomida olgan og‘ir tan jarohatlari oqibatida vafot etgan. 216 soatdan ortiq vaqt mobaynida bo‘ladigan marosimda ensyerro, taxminan, chorak soat (yoki 15 daqiqa) davom etadi. Qolgan vaqtda bayram sayri, karnaval, ulkan qo‘g‘irchoqlar paradi, turli kiyimlar namoyishi, ko‘cha san’atkorlarining chiqishi va korrida bo‘lib o‘tadi.
Avvalroq Ispaniyaning Malyorka orolidagi Manakor shahri politsiyasi 22 kishiga koronavirus yuqtirishda gumonlangan 40 yoshli fuqaroni qo‘lga olganini ma’lum qildi. U 8 kishiga bevosita, 14 kishiga bilvosita koronavirus yuqtirgan, kasallanganlar orasida uch nafar chaqaloq ham borligi aytilmoqda.
Shuningdek, Ispaniyada ilk bor Amerika yovvoyi qorako‘zanlarida koronavirus infeksiyasi borligi aniqlandi. Lekin mahalliy hukumat mazkur holatda kasallikning odamga yuqish ehtimoli yo‘qligini bildirgan.
Izoh (0)