Испаниянинг Памплона шаҳри раҳбари Энрике Майя коронавирус пандемияси сабабли кетма-кет иккинчи йил Сан-Фермин фестивалини бекор қилди, деб ёзмоқда «Интерфакс».
«Афсуски, мен 2021 йилда ҳам Сан-Фермин фестивалини расман бекор қилишга мажбурман», — деб Майянинг сўзларидан иқтибос келтирди ОАВ.
Унинг таъкидлашича, бу қарор коронавирус тарқалишининг юқори хавфи ва минтақадаги вакцинациянинг паст даражаси билан боғлиқ.
Маълумот учун, Сан-Фермин Памплонада ҳар йили 6—14 июнь кунлари ўтказиладиган фестиваль бўлиб, маросим 6 июнда, авлиё Фермин кунининг ярмида бошланади. Байрам, биринчи навбатда, энсьерро (12 бош қутурган буқадан қочиш) туфайли машҳур ҳисобланади. 1924 йилда 15 нафар иштирокчи тадбир давомида олган оғир тан жароҳатлари оқибатида вафот этган. 216 соатдан ортиқ вақт мобайнида бўладиган маросимда энсьерро, тахминан, чорак соат (ёки 15 дақиқа) давом этади. Қолган вақтда байрам сайри, карнавал, улкан қўғирчоқлар паради, турли кийимлар намойиши, кўча санъаткорларининг чиқиши ва коррида бўлиб ўтади.
Аввалроқ Испаниянинг Мальорка оролидаги Манакор шаҳри полицияси 22 кишига коронавирус юқтиришда гумонланган 40 ёшли фуқарони қўлга олганини маълум қилди. У 8 кишига бевосита, 14 кишига билвосита коронавирус юқтирган, касалланганлар орасида уч нафар чақалоқ ҳам борлиги айтилмоқда.
Шунингдек, Испанияда илк бор Америка ёввойи қоракўзанларида коронавирус инфекцияси борлиги аниқланди. Лекин маҳаллий ҳукумат мазкур ҳолатда касалликнинг одамга юқиш эҳтимоли йўқлигини билдирган.
Изоҳ (0)