Shavkat Mirziyoyev: “Pandemiya davrida xizmat ko‘rsatish sohasidagi tadbirkorlarni qo‘llab-quvvatlash uchun 35 trillion so‘mlik ko‘mak berildi”

O‘zbekistonda 2020-yili tadbirkorlikni rivojlantirish dasturlari doirasida xizmat sohasiga 1 trillion so‘m imtiyozli kredit resurslari ajratilgan. Bu haqda Prezident Shavkat Mirziyoyev raisligida xizmat ko‘rsatish sohasini rivojlantirish bo‘yicha 2021-yilda amalga oshiriladigan ustuvor vazifalarga bag‘ishlangan videoselektor yig‘ilishida ma’lum qilindi, deya xabar bermoqda “Daryo” muxbiri.

“Pandemiyaning salbiy ta’siri ko‘proq xizmatlar va servisga to‘g‘ri kelgani bois ushbu sohadagi tadbirkorlarni qo‘llab-quvvatlash uchun 24 ta turdagi soliq imtiyozlari, subsidiya va boshqa preferensiyalar taqdim etish orqali 35 trillion so‘mlik ko‘mak berildi. Bu esa ham tadbirkorlar, ham banklar uchun katta imkoniyat bo‘ldi.

Masalan, o‘tgan yili tadbirkorlikni rivojlantirish dasturlari doirasida xizmat sohasiga 1 trillion so‘m imtiyozli kredit resurslari ajratildi.

Bundan tashqari, tijorat banklari o‘z mablag‘lari hisobidan sohaga qo‘shimcha yana 14 trillion so‘m kreditlar ajratgani ham aholining xizmatlar bozoriga qiziqishi yuqoriligi, hali bu sohada imkoniyatlar ko‘pligidan dalolat beradi”, – dedi davlat rahbari.

Ta’kidlanishicha, 2020-yili keng imtiyozlar berilgani natijasida servis sohalarida o‘zini o‘zi band qilgan 500 ming nafar fuqaro rasmiy ro‘yxatdan o‘tgan.

“Qaysi hudud, shahar va tumanlar ushbu imkoniyatlardan samarali foydalangan bo‘lsa, o‘z natijasini, albatta, berdi.

Jumladan, Qo‘qon va Shirin shaharlari, Karmana tumanida aholi jon boshiga umumiy xizmatlar hajmi 6,5 million so‘mni tashkil etib, respublika ko‘rsatkichidan yuqori bo‘ldi (6,4 million so‘m). Lekin, 26 ta, xususan Beruniy, Shumanay, Chiroqchi, Qamashi, Guliston, Xovos, Oltinsoy, Qumqo‘rg‘on, O‘zbekiston, Yozyovon tumanlarida bu ko‘rsatkich eng past (2 million so‘mdan kam)”, – dedi Prezident.

Bundan avval O‘zbekistonda ish beruvchilarga 25 yoshgacha bo‘lgan xodimlar uchun to‘langan soliq summasi qaytarilishi hamda O‘zbekistondagi talabalarga ijara to‘lovining 50 foizi BHMning bir baravaridan oshmagan taqdirda to‘lab berilishi haqida xabar berilgandi.