Shavkat Mirziyoyev 22-aprel kuni xizmat ko‘rsatish sohasini rivojlantirish masalalari bo‘yicha videoselektor yig‘ilishi o‘tkazadi. Bu haqda Prezident matbuot xizmati xabar berdi.
Qayd etilishicha, iqtisodiyotning ushbu muhim yo‘nalishiga juda keng imkoniyatlar yaratilishi, jumladan, soha subyektlariga katta miqdorda moliyaviy resurslar taqdim etilishi kutilmoqda.
Eslatib o‘tamiz, Shavkat Mirziyoyev 13-aprel kuni yoshlar masalalariga bag‘ishlab videoselektor o‘tkazib, ayrim rahbarlarning yoshlar masalalariga e’tibori haligacha bugungi kun talab darajasida emasligini qat’iy ta’kidlagandi, yoshlar bilan ishlashni eplay olmagan bir qator amaldorlarni ishdan olgandi.
Shuningdek, davlat rahbari Savdo-sanoat palatasi (SSP) raisi Adham Ikromovga tadbirkor yoshlar bilan ishlashni tizimli tashkil etmagan uchun palataning Buxoro va Surxondaryo viloyatlaridagi rahbarlarini lavozimidan bo‘shatish haqida topshiriq bergandi.
Undan avval, kichik va o‘rta biznesni qo‘llab-quvvatlash hamda aholi bandligini ta’minlash dasturini amalga oshirish choralari yuzasidan 8-aprel kuni o‘tkazilgan videoselektorda Prezident uch oy ichida sektor rahbarlari tadbirkorlar bilan ishlashda natija qilmasa, ishdan olinishi haqida ogohlantirgandi, ikkita viloyat hokimi, prokurori va ichki ishlar boshlig‘iga hayfsan berib, chorak yakunigacha o‘zgarish bo‘lmasa, barchasi ishdan ketishini aytgandi. Shuningdek, tuman va shahar sektor rahbarlari kichik tadbirkorlar bilan kuniga 3 marta, kerak bo‘lsa, kechasi ham uchrashib, muammolarini hal qilishini ta’kidlagandi.
Izoh (0)