Shavkat Mirziyoyev raisligida 13-aprel kuni o‘tkazilgan videoselektorda davlat rahbari 1-maydan boshlab talabalarga ijara to‘lovining yarmi davlat tomonidan qoplab berilishi ma’lum qilingandi. Shunga ko‘ra, Prezidentning “Yoshlarning tadbirkorlik faoliyatini qo‘llab-quvvatlash va bandligiga ko‘maklashish, ularni ijtimoiy himoya qilish hamda bo‘sh vaqtini mazmunli tashkil etishga oid qo‘shimcha chora-tadbirlar to‘g‘risida”gi farmoni qabul qilindi. Bu haqda “Gazeta.uz” xabar qildi.

Hujjatga muvofiq, 2021-yil 1-maydan boshlab yotoqxona bilan qamrab olinmagan va o‘ziga, shu jumladan, ota-onasi (qonuniy vakillari)ga tegishli bo‘lmagan uyda ijara huquqi asosida yashaydigan davlat OTMlari talabalarining 60 foiziga ular tomonidan to‘lanadigan oylik ijara to‘lovining 50 foizi davlat budjeti hisobidan qoplab beriladi.

Birinchi navbatda ehtiyojmand oila farzandlariga, o‘rnak ko‘rsatgan va faol talabalar ijara to‘lovining yarmi qoplanadi. Ijara to‘lovining qoplab beriladigan qismi Toshkent shahrida — BHMning 1 baravaridan, qolgan hududlarda — BHMning 0,5 baravari miqdoridan oshmasligi lozim.

Prezident boshchiligida o‘tgan videoselektorda mas’ullarga mazkur tizim orqali dastlabki bosqichda 60 ming nafar yoshlar qamrab olinishi yuzasidan topshiriq berilgandi.

Jumladan, moliya vaziri Timur Ishmetovga ushbu maqsadlar uchun 100 mlrd so‘m ajratish, oliy va o‘rta maxsus ta’lim vaziri Abduqodir Toshqulov, rektor va viloyat moliya boshliqlari ikki haftada ijarada turgan talabalar bilan uchrashib, 1-maydan to‘lovlarni boshlashi zarurligi aytilgan.