“Amaldorlarning ko‘chmas mulklari va mashinalari to‘g‘risidagi ma’lumotlar ochiqlanishi kerak” — adliya vaziri Ruslanbek Davletov

Adliya vaziri Ruslanbek Davletov hozir ham raqamlashtirishga qarshi yashirin qarshiliklar borligi, bu birinchi navbatda eskicha ishlashga o‘rgangan ayrim mansabdorlar va tashkilotlarga taalluqliligini aytdi. “Gazeta.uz”ning xabar berishicha, bu haqda u 22-aprel kuni Tashkent Law Spring II xalqaro yuridik forumining ochilish marosimida aytib o‘tdi. Ruslanbek Davletov karantinga olingani bois xalqaro forumda onlayn tarzda ishtirok etgan.

“Albatta, jamiyat xohlayotgan ochiqlik, hisobdorlik, byurokratiya va korrupsiyadan xoli bo‘lishni barcha tashkilotlar bir xilda tushunmaydi va qabul qilmaydi. Ko‘nikmagan bu qadriyatlarga, — deya so‘zida davom etdi Davletov, — Raqamlashtirish va ochiqlik esa ulardan umuman yangicha ishlashni talab qiladi. Birgina davlat xaridlaridagi ochiqlik qanchalik bu illatlarga zarba bermoqda, biz buni olqishlaymiz, baribir endi zamon boshqacha, tashkilotlar o‘zgarmasa, xalq ishonchini oqlamaydi, bu esa ularni shubhasiz inqirozga yetaklaydi”.

U buning uchun barchaga birdek tushunarli bo‘lgan har bir sohada ochiqlikni ta’minlash standartlari yaratilishi lozimligini ta’kidladi. Ularni o‘qigan har bir kishi bir xilda tushunib, tegishli talabni qo‘ya olishi kerak.

“Ikkinchidan, xuddi shunday raqamlashtirishning minimal talablari bo‘lishi kerakki, tashkilotlar o‘z faoliyatida shu dasturlardan minimal ravishda foydalanishi kerak. Jamoatchilik ham talab qila olishi kerak”, — degan Ruslanbek Davletov.

Vazir O‘zbekiston uchun raqamlashtirish va ochiqlik bo‘yicha ustuvor sohalarni belgilab olish kerakligiga e’tibor qaratgan.

“Chunki yo‘nalish ko‘p, muammo yetarli, resurslar tanqisligini e’tiborga olib, eng birinchi navbatda qilinishi kerak bo‘lgan va davlat tomonidan moliyalashtirilishi va qo‘llab-quvvatlanishi kerak bo‘lgan yo‘nalishlar belgilanishi kerak”, — degan u, shuningdek, bu borada ochiqlanishi lozim bo‘lgan bir qator masalalarni sanab o‘tgan.

“Masalan, birinchi navbatda budjet pullarining sarflanishi ochiqligining yangi bosqichi, ayniqsa, dolzarb bo‘lgan avtomobil yo‘llariga ketayotgan xarajatlar, aniq manzillari bilan interaktiv kartalarda ko‘rinishi kerak, har bir tashkilotning o‘z ma’muriy binolarini ta’mirlashga ketkazayotgan xarajatlari, amaldorlarning ko‘chmas mulklari va mashinalari to‘g‘risidagi ma’lumotlar ochiqlanishi kerak”, — degan Davletov.

U forumga tashrif buyurganlarni mazkur jumboqlarni birgalikda yechish, o‘ylash va tahlil qilish uchun Toshkent huquq bahori platformasi doirasida ochiq va konstruktiv muloqotga chaqirgan.

“Umuman, to‘rtinchi sanoat inqilobi sharoitida huquqiy institutlarga yangicha nazar tashlash va an’anaviy huquqiy mexanizmlarni yangi voqelikka izchil moslashtirish yo‘llarini birgalikda o‘ylaylik”, — degan adliya vaziri.

Eslatib o‘tamiz, Korrupsiyaga qarshi kurashish agentligi amaldorlarning daromadlari deklaratsiya qilinishini nazarda tutuvchi qonun loyihasini ishlab chiqdi. Ushbu qonun loyihasida mansabdor shaxslarning barchasi daromadlari va xarajatlarini deklaratsiyalash nazarda tutilgan. Shuningdek, Prezidentga ham yil davomida ishlab topgan puli haqida hisobot topshirish majburiyati yuklatilishi mumkin. Qonun loyihasi 2021-yil 25-mart kuni O‘zbekiston Prezidenti Administratsiyasiga kiritildi.