O‘zbekistonda ish beruvchilarga 25 yoshgacha bo‘lgan xodimlar uchun to‘langan soliq summasi qaytariladi
O‘zbekistonda 2021-yil 1-maydan boshlab 2023-yil 1-yanvarga qadar ish beruvchilarga (budjet tashkilotlari, davlat korxonalari, ustav jamg‘armasida davlat ulushi 50 foiz va undan ortiq bo‘lgan yuridik shaxslar bundan mustasno) ular tomonidan 25 yoshdan oshmagan xodimlar uchun to‘langan ijtimoiy soliq summasi davlat budjetidan to‘liq qaytarib beriladi.
Bu haqda “Yoshlarning tadbirkorlik faoliyatini qo‘llab-quvvatlash va bandligiga ko‘maklashish, ularni ijtimoiy himoya qilish hamda bo‘sh vaqtini mazmunli tashkil etishga oid qo‘shimcha chora-tadbirlar to‘g‘risida”gi Prezident farmonida belgilandi.
Bunda, ijtimoiy soliq summasi yosh xodimlar olti oy davomida uzluksiz mehnat faoliyatini amalga oshirishi sharti bilan yettinchi oydan boshlab qaytariladi.
“Yoshlar daftari”ga kiritilgan yoshlarga tadbirkorlik faoliyatini boshlash va o‘zini o‘zi band qilishga zarur bo‘lgan asbob-uskunalar va mehnat qurollarini xarid qilish uchun bazaviy hisoblash miqdorining 40 baravaridan ko‘p bo‘lmagan miqdorda “Yoshlar daftari” jamg‘armalari hisobidan subsidiya ajratiladi.
2021-yil 1-iyundan boshlab “Yoshlar daftari”ga kiritilgan tadbirkorlik faoliyatini boshlash uchun bino va inshootlarni ijaraga olgan yosh tadbirkorlarga bir yillik ijara xarajatlarining 30 foizi, biroq BHMning 25 baravarigacha bo‘lgan miqdori “Yoshlar daftari” jamg‘armalari hisobidan kompensatsiya qilinadi.
Moliya vazirligiga ikki hafta muddatda o‘zi, 26 yoshga to‘lmagan farzandlari yoki eri (xotini) professional ta’lim muassasalarida ta’lim olishi uchun yo‘naltiriladigan soliq to‘lovchining ish haqi va boshqa daromadlari summasini jismoniy shaxslardan olinadigan daromad solig‘idan ozod qilishni nazarda tutuvchi qonun loyihasini Vazirlar Mahkamasiga kiritish vazifasi yuklatildi.
Shuningdek, 2021-yil 1-maydan boshlab yotoqxona bilan qamrab olinmagan va o‘ziga, shu jumladan, ota-onasi (qonuniy vakillari)ga tegishli bo‘lmagan uyda ijara huquqi asosida yashaydigan davlat OTMlari talabalarining 60 foiziga ular tomonidan to‘lanadigan oylik ijara to‘lovining 50 foizi davlat budjeti hisobidan qoplab beriladi.
Bunda ijara to‘lovining qoplab beriladigan qismi Toshkentda BHMning 1 baravari, qolgan hududlarda esa BHMning 0,5 baravaridan oshmasligi lozim. Qayd etilishicha, ijara to‘lovining qoplab beriladigan qismi birinchi navbatda ehtiyojmand oila farzandlariga, o‘rnak ko‘rsatgan va faol talabalar uchun qoplab beriladi.
Bundan tashqari, OTMlar tomonidan ularning budjetdan tashqari mablag‘lari hisobidan ijara huquqi asosida yashaydigan boshqa talabalarga ham oylik ijara to‘lovining bir qismi qoplab berilishi mumkin.
Eslatib o‘tamiz, Shavkat Mirziyoyev raisligida 13-aprel kuni o‘tkazilgan yig‘ilishda davlat rahbari 2021-yilning 1-may va 1-iyunidan boshlab tadbirkorlar va “yoshlar daftari”dagi yigit-qizlarga bir qator imtiyoz hamda imkoniyatlar taqdim etilishini ta’kidlagandi.
Prezident 1-maydan boshlab agar korxona va kompaniyalar yoshlarni ishga qabul qilsa, korxonalarga ushbu xodimlar uchun to‘langan ijtimoiy soliq qaytarib berilishini, bu orqali 2021-yilda kamida 500 ming yoshlarni ishga qabul qilgan tadbirkorlarni rag‘batlantirish mexanizmi yaratilishi va tadbirkorlar ixtiyorida bir yilda 1 trillion so‘mdan ziyod mablag‘ qolishini aytgandi.
