Braziliya Oliy sudi pandemiya sharoitida prezident Jair Bolsonaruning xatti-harakatlari ustidan tekshiruv olib borishni ma’qulladi, deb yozmoqda Deutsche Welle.
Tergov-surishtiruv ishlari Braziliya Senati tomonidan boshlangan edi. Senat spikeri Rodrigo Pachekoning so‘zlariga ko‘ra, tergov jarayonida federal hukumatning sog‘liqni saqlash sohasidagi inqirozga munosabati tekshiriladi. Ushbu tergov pandemiyaga qarshi kurash uchun federal budjet mablag‘larining shtatlar o‘rtasida taqsimlanishi bo‘yicha tekshiruvi bilan bir vaqtda o‘tkaziladi.
Natijalarga qarab, tergov huquqni muhofaza qilish organlariga yuborilishi mumkin.
Braziliyada koronavirusdan vafot etganlar soni 350 mingdan ko‘proqni tashkil etadi, bu AQShdan keyingi ikkinchi eng yuqori ko‘rsatkich hisoblanadi. Kasallanish darajasi bo‘yicha esa mamlakat AQSh va Hindistondan keyin uchinchi o‘rinda turibdi.
Braziliya prezidenti pandemiya boshlanganidan buyon niqob taqishni rad etib, o‘zini o‘zi yakkalash choralariga qarshi turib, bir necha bor mutaxassislarning chaqiriqlarini e’tiborsiz qoldirdi. Shuningdek, u virusning keng tarqalayotganiga qaramay, chet elliklarning mamlakatga kirishiga ruxsat berdi. Buning uchun Braziliya kasaba uyushmalari prezident ustidan sudga shikoyat kiritdi va Bolsonaruning koronavirus bilan kasallangani tasdiqlangan taqdirda, uning jarimaga tortilishi belgilandi.
Ma’lumot uchun, 65 yoshli Bolsonaru bir necha bor COVID-19 pandemiyasining haqiqati to‘g‘risida shubhada ekanini ma’lum qilgan. Ba’zi joylarda ijtimoiy masofa qoidasini buzgan. 2020-yilning yozida esa u koronavirus bilan kasallangan va davolanib chiqqan.
Avvalroq Jair Bolsonaru Braziliya kardiologlar jamiyati rahbari, doktor Marselu Keyroga general Eduardo Pazuellaning o‘rniga sog‘liqni saqlash vaziri lavozimiga tayinlanganini e’lon qildi va shu bilan Keyroga mamlakatda koronavirus pandemiyasi davrida sog‘liqni saqlash vaziri lavozimiga tayinlangan to‘rtinchi odam bo‘ldi.
Izoh (0)