AQSh Turkiyaga AQSh harbiy dengiz kuchlarining ikkita kemasi Bosfor orqali Qora dengizga o‘tish rejasini bekor qilganini aytdi. Bu haqda Turkiya tashqi ishlar vazirligiga tayanib, “RIA Novosti” xabar berdi.
“Mamlakatlar siyosati” Telegram-kanalida yozilishicha, bu Jo Bayden va Vladimir Putin o‘rtasida 13-aprel kuni bo‘lib o‘tgan telefon orqali suhbatidan keyin o‘zgarishlar boshlangani hamda urush xavfining asta-sekin uzoqlashayotganidan dalolat beruvchi ilk qadam.
Dastlab, Amerikaning ikkita Roosevelt va Donald Cook esminetslari 14 va 15-aprel kunlari navbat bilan Qora dengiz hududiga kirib, u yerda 4 va 5-maygacha qolishi haqida xabar berilgan edi. Ushbu manyovr o‘z qo‘shinlarini Ukraina chegarasida to‘playotgan Rossiya uchun signal bo‘lishi kerak edi.
Pentagon vakili Jon Kirbining so‘zlariga ko‘ra, Amerikaning Qora dengizdagi harbiy kemalari operatsiyalari “odatiy” bo‘lib, AQSh ushbu harakatlarni Montryo konvensiyasiga binoan Turkiya rasmiylari bilan muvofiqlashtirmoqda.
Rossiya tashqi ishlar vaziri Sergey Lavrovning ta’kidlashicha, AQSh kemalarining Qora dengizga o‘tishiga tajovuzkor safsatalar hamrohlik qilmoqda. Vashington aniq nimani ko‘zlayotgani Moskvaga qorong‘i bo‘lib turibdi.
Rossiya tashqi ishlar vazirining o‘rinbosari Sergey Ryabkov AQSh kemalarining Qora dengizga kirib kelishini provokatsiya deb atadi. “Rossiya AQShni Qrim va Qora dengiz sohillaridan uzoqroq turgani yaxshiroq ekani haqida ogohlantiradi”, — dedi u.
AQSh prezidenti Jo Bayden rossiyalik hamkasbi Vladimir Putin bilan 13-aprel kuni bo‘lib o‘tgan telefon orqali suhbat chog‘ida uni “yaqin haftalar”da uchrashishga taklif qilgan. Bu haqda Bryusseldagi matbuot anjumanida AQSh davlat kotibi Entoni Blinken ma’lum qildi.
Blinkenning so‘zlariga ko‘ra, Vashington Moskva bilan barqaror va oldindan ko‘rish mumkin bo‘lgan aloqalar o‘rnatishni istaydi, buning uchun aloqa kanallarini yaratish kerak. Bu AQShga “qarashlarimiz, siyosatimiz, Rossiyaning harakatlariga e’tirozlarimiz to‘g‘risida ochiq gapirishga imkon beradi”, dedi davlat kotibi. “Bu esa vaziyatni noto‘g‘ri baholashdan saqlanish uchun muhimdir. Kecha prezident Bayden go‘shakni olib, prezident Putinga qo‘ng‘iroq qilganida va yaqin haftalarda uchrashishni taklif qilganida buning guvohi bo‘ldingiz”, — deya qo‘shimcha qildi u.
Avval AQShning garchi Rossiya elchisini chaqirib olganiga qaramay, Moskvadagi elchisini o‘zgartirmaslikka qaror qilgani haqida xabar berilgandi.
Izoh (0)