Braziliya prezidenti Jair Bolsonaru 15-mart kuni Braziliya kardiologlar jamiyati rahbari, doktor Marselu Keyroga general Eduardo Pazuellaning o‘rniga sog‘liqni saqlash vaziri lavozimiga tayinlanganini e’lon qildi. Bu haqda “Interfaks” xabar berdi.
Foto: Poder360
“Bugun Marsel Keyroga lavozimga tayinlandi. Uni bir necha yildan beri bilaman... Pazuellaning ishini davom ettirib, yaxshi ishlash uchun unda kerakli barcha narsa bor”, — degan Bolsonaru.
Prezidentning so‘zlariga ko‘ra, Keyroga o‘ziga ishchi jamoa tanlaydi va bir-ikki haftadan so‘ng ish boshlaydi.
“Marsel Keyroga sog‘liqni saqlash masalasidagi muammolarini juda yaxshi tushunadi, u butun dunyoga ta’sir qilayotgan ushbu kasallikdan vafot etayotganlar sonini kamaytirish bo‘yicha zarur choralarni ko‘radi”, — deb qo‘shimcha qilgan Bolsonaru.
Keyroga koronavirus pandemiyasi davrida sog‘liqni saqlash vaziri lavozimiga tayinlangan to‘rtinchi odam bo‘ldi.
U mamlakatda pandemiyaning eng og‘ir davrlaridan birida ushbu lavozimga kirishmoqda. 15-mart holatiga ko‘ra, Braziliyada koronavirus bilan kasallanganlar soni 11,5 millionga yetdi, 280 mingga yaqin odam virus qurboniga aylandi. Mamlakat shifoxonalarida barcha o‘rinlar to‘lgan.
Lavozimidan ketayotgan Pazuella rasmiy tibbiy tayyorgarlikka ega emasligi va mamlakatdagi pandemiya bilan bog‘liq ahvol uchun ko‘plab tanqidlarga uchradi. Avvalroq Pazuella davlat rahbari uni “almashtirish” masalasini ko‘rib chiqayotganini tan olgan edi, lekin uning o‘zi iste’foga chiqishini so‘ramaganini ta’kidlagan.
Avvalroq dunyo bo‘yicha bir hafta ichida koronavirus bilan kasallanish holatlari yana ko‘paygani va Braziliyada 413 mingdan ortiq kishida virus qayd etilgani haqida xabar berilgan edi.
Shuningdek, Braziliyaning sog‘liqni saqlashni tartibga soluvchi Anvisa kompaniyasi Pfizer va BioNTech tomonidan ishlab chiqarilgan koronavirusga qarshi vaksinadan foydalanishga ruxsat berdi.
