Бразилия Олий суди пандемия шароитида президент Жаир Болсонарунинг хатти-ҳаракатлари устидан текширув олиб боришни маъқуллади, деб ёзмоқда Deutsche Welle.
Тергов-суриштирув ишлари Бразилия Сенати томонидан бошланган эди. Сенат спикери Родриго Пачеконинг сўзларига кўра, тергов жараёнида федерал ҳукуматнинг соғлиқни сақлаш соҳасидаги инқирозга муносабати текширилади. Ушбу тергов пандемияга қарши кураш учун федерал бюджет маблағларининг штатлар ўртасида тақсимланиши бўйича текшируви билан бир вақтда ўтказилади.
Натижаларга қараб, тергов ҳуқуқни муҳофаза қилиш органларига юборилиши мумкин.
Бразилияда коронавирусдан вафот этганлар сони 350 мингдан кўпроқни ташкил этади, бу АҚШдан кейинги иккинчи энг юқори кўрсаткич ҳисобланади. Касалланиш даражаси бўйича эса мамлакат АҚШ ва Ҳиндистондан кейин учинчи ўринда турибди.
Бразилия президенти пандемия бошланганидан буён ниқоб тақишни рад этиб, ўзини ўзи яккалаш чораларига қарши туриб, бир неча бор мутахассисларнинг чақириқларини эътиборсиз қолдирди. Шунингдек, у вируснинг кенг тарқалаётганига қарамай, чет элликларнинг мамлакатга киришига рухсат берди. Бунинг учун Бразилия касаба уюшмалари президент устидан судга шикоят киритди ва Болсонарунинг коронавирус билан касаллангани тасдиқланган тақдирда, унинг жаримага тортилиши белгиланди.
Маълумот учун, 65 ёшли Болсонару бир неча бор COVID-19 пандемиясининг ҳақиқати тўғрисида шубҳада эканини маълум қилган. Баъзи жойларда ижтимоий масофа қоидасини бузган. 2020 йилнинг ёзида эса у коронавирус билан касалланган ва даволаниб чиққан.
Аввалроқ Жаир Болсонару Бразилия кардиологлар жамияти раҳбари, доктор Марселу Кейрога генерал Эдуардо Пазуэлланинг ўрнига соғлиқни сақлаш вазири лавозимига тайинланганини эълон қилди ва шу билан Кейрога мамлакатда коронавирус пандемияси даврида соғлиқни сақлаш вазири лавозимига тайинланган тўртинчи одам бўлди.
Изоҳ (0)