Toshkentdagi jamoat transportlaridan imtiyozli transport kartasi yordamida foydalanuvchilar yonida ularning shaxsini tasdiqlovchi hujjatlar ham bo‘lishi kerak, deb xabar beradi “Toshshahartransxizmat”.
Ta’kidlanishicha, so‘nggi vaqtlarda poytaxt aholisi muammoga duch kela boshlagan — jamoat transportidagi konduktorlar talabalardan ularning imtiyozli transport kartasidan foydalanishga haqi borligini tasdiqlovchi hujjatlarni talab qilishni boshlagan. Ushbu muammoga Telegram’dagi “Ko dnu” kanali e’tibor qaratgan.
Jamoat transporti foydalanuvchilari imtiyozli kartalarni olishga hujjat ko‘rsatgani sabab nega yana uni taqdim etishlari lozimligini, konduktorlar qaysi asosga ko‘ra hujjat talab qilishga haqli ekanini tushunmayotganliklarini bildirgan.
“Toshshahartransxizmat” mazkur holatga munosabat bildirdi:
Imtiyozli transport kartasi — avtomatlashtirilgan to‘lov tizimi operatorining ma’lumotlar bazasida ro‘yxatdan o‘tgan, shaxsiylashtirilgan transport kartasi bo‘lib, yo‘lovchiga jamoat transportida imtiyozli tarif asosida cheklanmagan miqdorda foydalanish huquqini kafolatlaydigan transport kartasidir (belgilangan yo‘nalishli va yo‘nalishsiz taksilardan tashqari).Avvalroq Transportdan bepul foydalanish huquqiga ega bo‘lgan shaxslarning yagona guvohnomalari 1-yanvardan o‘z kuchida qolishi, Toshkentdagi avtobus bekatlari do‘konlarsiz bo‘lishi hamda Toshkentda 1-dekabrdan boshlab elektron transport kartasi narxi 15 ming so‘m etib belgilangani haqida xabar berilgandi.Imtiyozga ega bo‘lgan talaba transport kartasini sotib olish uchun, shaxsni tasdiqlovchi hujjat bo‘lgan pasport nusxasi hamda, talabalik guvohnoma nusxasi talab etiladi.
Bundan tashqari, “Shahar yo‘lovchilar transporti to‘g‘risida”gi qonunining 25-moddasiga muvofiq transportda imtiyozli yurish huquqini tasdiqlovchi hujjatlarni ko‘rsatishlari majburiy etib belgilangan.
Shu bilan birga, Vazirlar Mahkamasining 2003-yil 4-noyabr sanasidagi “Avtomobil transportida yo‘lovchilar va bagajni tashish qoidalari to‘g‘risida”gi 482-son qarorining 110-bandiga asosan, avtotransportda bepul yoki imtiyozli yurish huquqiga ega bo‘lgan shaxslarga, mansubligi yoki mulkchilik shaklidan qat’i nazar yo‘nalishli avtobuslarda bepul va imtiyozli yurishga ruxsat beriladi. Imtiyozli yurish huquqiga ega yo‘lovchilar, avtobusda imtiyozli yurish huquqini tasdiqlovchi hujjatlarni olib yurishlari kerakligi belgilangan.
Izoh (0)