Oliy Majlis Qonunchilik palatasi deputati Rasul Kusherbayev Yangiyo‘ldagi kanalizatsiya tarmoqlari ta’mirlanmagani sabab qurilish vaziri Botir Zokirovga e’tiroz bildirib, videomurojaat yo‘lladi.
Deputatning so‘zlariga ko‘ra, suv tozalash inshooti Toshkent viloyatining Yangiyo‘l tumanida joylashgan bo‘lib, ko‘p yillardan beri ishlamaydi.
“Yangiyo‘l shahridagi kanalizatsiya tarmoqlaridan keladigan iflos suv, tozalanmay to‘g‘ri toza ariqqa tushirib yuboriladi. Ishlamay turgan ushbu inshoot shu atrofda yashaydigan ko‘plab odamlarning dardi va fojiasi. Ko‘p achchiq xotiralar sababchisi: iflos havo, iflos suv, g‘uj-g‘uj chivin-u pashshalar makoni... Hatto o‘spirin yoshdagi o‘z jiyanim inshootning qarovsiz ochiq chuqurchasiga bexos tushib ketib, iflos suvdan vafot etgan”, — deydi Kusherbayev.
Kusherbayevning ta’kidlashicha, u 2019-yili bosh vazir Abdulla Aripovga kirib iltimos qilganimdan so‘ng, inshootni ta’mirlash ishlari boshlangan.
“Biroq xursandchiligimiz ko‘pga cho‘zilmadi. Hisob palatasining tushunarsiz talabi bilan ishlar to‘xtatildi, Qurilish vaziri va Uy-joy kommunal xizmat ko‘rsatish vazirining xohishi sabab esa ishlar cho‘zilib, mana uchinchi yildirki, obyekt o‘zgarishsiz yotibdi.
Keyin yangi loyiha bo‘yicha ishlaymiz deyishdi. Lekin Qurilish vazirligi bilan o‘sha paytdagi Uy-joy kommunal xizmat ko‘rsatish vazirimiz [Muzaffar Soliyev — tahr.] buni xohlamadi. Bir yil oldin shu yerning o‘zida qilingan taqdimotlarning o‘zim guvohi bo‘lganman. Hukumat tayyor beraman deb turgan pulni xohlashmadi, o‘yin qilishdi.
Hurmatli vazirimiz Botir Zokirov arzon variantdagi yangi loyiha bo‘yicha qurilishni xohlamadi, ‘eski bo‘yicha qilamiz’ dedi. Loyihachi tadbirkorni qaytarib yubordi. O‘zlari taniydigan bolalariga bermoqchi bo‘ldi, shu yerni. Mana, 2020-yil ham o‘tdi, 2021-yilning 14-apreli bugun. Rahmat o‘sha vazirlarga!
Hozirda amaldagi vazirimiz Botir Zokirov sizni vazir bo‘lib saylanishingizga o‘zi ovoz bermay, qarshi bo‘lgan edim. ‘Korrupsiyaga qarshi kurashaman’, degan edingiz, vaholangki, qurilishdagi korrupsiya sizni davringizga ko‘paydi”, — deydi Kusherbayev.
“Mas’ullarga ishonib, odamlarni ishontirgan bizda esa ko‘zlariga qarashga bet yo‘q”, — deb ta’kidlaydi deputat.
Avvalroq Rasul Kusherbayev “O‘zavtosanoat”ga 100 gektar sug‘oriladigan yerning beg‘araz va auksionsiz berilishini tanqid qilgani, 2 yoshgacha bola pulini olishni hammaga qaytarish kerakligini aytgani hamda Oliy sud fuqarolarni qabul qilmayotganini tanqid qilgani haqida xabar berilgandi.
Izoh (0)