Qarshi davlat universitetining Fizika-matematika fakultetida to‘lov-kontrakt asosida ikkinchi kursda tahsil olayotgan talaba o‘zini osib qo‘ygani to‘g‘risida xabar berilgandi. Universitet mazkur voqeaga munosabat bildirib, talabaga hech kim tazyiq o‘tkazmaganini ma’lum qildi.
Ma’lum qilinishicha, marhum R.F. Fizika-matematika fakultetining Informatika o‘qitish metodikasi yo‘nalishi 2-kursida o‘qigan. 2021-yil 26-yanvar kuni ushbu mudhish voqea o‘z tog‘asining uyida sodir bo‘lgan.
“2021-yil 29-yanvar kuni ertalab universitet psixologi A.Husanov, Informatika o‘qitish metodikasi kafedrasi mudiri I.Yo‘ldoshev, guruh rahbari L.Safarov, Muborak tuman ‘Geolog’ MFY raisi N.Ashirov hamrohligida marhumning xonadoniga ta’ziya bildirgani borilgan. R.F.ning otasi guruh murabbiyi L.Safarov bilan batafsil suhbatlashgan, oilasining universitet rahbariyati va o‘qituvchilari jamoasiga hech qanday e’tirozi yo‘qligini, o‘g‘lining o‘limidan qattiq qayg‘uda ekanini bildirgan”, — deyiladi munosabatda.
Qarshi davlat universiteti ushbu hodisani batafsil o‘rganib, hech kimga tazyiq o‘tkazilmagani va hech qachon bosti-bosti qilinmaganini bildirdi.
“Shuningdek, o‘z farzandi dog‘ida qattiq iztirobda bo‘lgan oila sha’nini o‘ylamay xabarni ommalashtirishga urinayotgan hurmatli ‘Ijtimoiy tarmoq ijodkorlari’ga esa tuhmat va yolg‘on xabar tarqatganlik uchun Ma’muriy javobgarlik to‘g‘risidagi hamda Jinoyat kodekslarida javobgarlik belgilanganini eslatadi”, — deya qayd etiladi xabarda.
Avvalroq mazkur holat yuzasidan Qarshi tumani prokuraturasi tomonidan qo‘shimcha tergovga qadar tekshiruv harakatlari o‘tkazilayotgani ma’lum qilingandi.
Mavzuga doir: Xorazmda 19 yoshli kelin o‘zini osib o‘ldirdi
Izoh (0)