O‘zbekistonda koronavirusga qarshi emlanganlarga onlayn-ma’lumotnomalarni berish boshlandi

O‘zbeksitonda koronavirusga qarshi emlanganlarga onlayn-ma’lumotnomalarni berish boshlandi. Bu haqda Yagona interaktiv davlat xizmatlari portali matbuot xizmati xabar berdi.

Endilikda vaksinatsiya jarayonidan o‘tgan fuqarolar “My.gov.uz” portali orqali ham emlanganlik to‘g‘risida ma’lumotnoma olishlari mumkin. Ushbu xizmatdan foydalanish uchun YaIDXPda ro‘yxatdan o‘tishning o‘zi kifoya.

Yagona portalda “COVID-19’ga vaksinatsiyalash holatini tekshirish” davlat xizmatiga o‘tiladi va tekshirish tugmasi bosiladi.

Ta’kidlanishicha, yaqin kunlarda mazkur yo‘nalishda yangi xizmatlar taqdim etiladi.

Avvalroq O‘zbekistonda to‘liq emlash kursini tamomlagan fuqarolarga QR-kodli sertifikat berilishi ma’lum qilingandi.

Eslatib o‘tamiz, aholini koronavirusga qarshi emlash tadbirlari 1-apreldan boshlandi. O‘zbekistonda bugungi kunda 1 million 660 ming doza vaksina bor. Ularning 660 ming dozasi COVAX jamg‘armasi tomonidan olib kelingan AstraZeneca vaksinasi, 1 million dozasi O‘zbekiston–Xitoy hamkorligida ishlab chiqilgan ZF-UZ-VAC 2001 vaksinasi.

Aholini ushbu vaksinalar bilan emlash bir paytning o‘zida amalga oshiriladi. Bunda emlanuvchi birinchi emlanishni qaysi vaksina bilan boshlasa, ikkinchisini ham aynan o‘sha vaksina bilan yakunlaydi. AstraZeneca vaksinasi bilan 2 marotaba, ZF-UZ-VAC 2001 vaksinasi bilan 3 marotaba emlash ko‘zda tutilmoqda. Ya’ni vaksinatsiya ikki xil vaksinada ikki xil amalga oshiriladi. Shuningdek, O‘zbekistonda xususiy klinikalarga COVID-19’ga qarshi pulli emlash o‘tkazishga ruxsat beriladi.