Тошкентдаги жамоат транспортларидан имтиёзли транспорт картаси ёрдамида фойдаланувчилар ёнида уларнинг шахсини тасдиқловчи ҳужжатлар ҳам бўлиши керак, деб хабар беради «Тошшаҳартрансхизмат».
Таъкидланишича, сўнгги вақтларда пойтахт аҳолиси муаммога дуч кела бошлаган — жамоат транспортидаги кондукторлар талабалардан уларнинг имтиёзли транспорт картасидан фойдаланишга ҳақи борлигини тасдиқловчи ҳужжатларни талаб қилишни бошлаган. Ушбу муаммога Telegram’даги «Ко дну» канали эътибор қаратган.
Жамоат транспорти фойдаланувчилари имтиёзли карталарни олишга ҳужжат кўрсатгани сабаб нега яна уни тақдим этишлари лозимлигини, кондукторлар қайси асосга кўра ҳужжат талаб қилишга ҳақли эканини тушунмаётганликларини билдирган.
«Тошшаҳартрансхизмат» мазкур ҳолатга муносабат билдирди:
Имтиёзли транспорт картаси — автоматлаштирилган тўлов тизими операторининг маълумотлар базасида рўйхатдан ўтган, шахсийлаштирилган транспорт картаси бўлиб, йўловчига жамоат транспортида имтиёзли тариф асосида чекланмаган миқдорда фойдаланиш ҳуқуқини кафолатлайдиган транспорт картасидир (белгиланган йўналишли ва йўналишсиз таксилардан ташқари).Аввалроқ Транспортдан бепул фойдаланиш ҳуқуқига эга бўлган шахсларнинг ягона гувоҳномалари 1 январдан ўз кучида қолиши, Тошкентдаги автобус бекатлари дўконларсиз бўлиши ҳамда Тошкентда 1 декабрдан бошлаб электрон транспорт картаси нархи 15 минг сўм этиб белгилангани ҳақида хабар берилганди.Имтиёзга эга бўлган талаба транспорт картасини сотиб олиш учун, шахсни тасдиқловчи ҳужжат бўлган паспорт нусхаси ҳамда, талабалик гувоҳнома нусхаси талаб этилади.
Бундан ташқари, «Шаҳар йўловчилар транспорти тўғрисида»ги қонунининг 25-моддасига мувофиқ транспортда имтиёзли юриш ҳуқуқини тасдиқловчи ҳужжатларни кўрсатишлари мажбурий этиб белгиланган.
Шу билан бирга, Вазирлар Маҳкамасининг 2003 йил 4 ноябрь санасидаги «Автомобиль транспортида йўловчилар ва багажни ташиш қоидалари тўғрисида»ги 482-сон қарорининг 110-бандига асосан, автотранспортда бепул ёки имтиёзли юриш ҳуқуқига эга бўлган шахсларга, мансублиги ёки мулкчилик шаклидан қатъи назар йўналишли автобусларда бепул ва имтиёзли юришга рухсат берилади. Имтиёзли юриш ҳуқуқига эга йўловчилар, автобусда имтиёзли юриш ҳуқуқини тасдиқловчи ҳужжатларни олиб юришлари кераклиги белгиланган.
Изоҳ (0)